Tschertga

Al cuntegn
Siglia al cuntegn da la paginaSiglia a la navigaziunSiglia a la tscherna da la linguaSiglia a la tscherna da la linguaRespostas simplas davart la vita en Svizra
  • DE
  • FR
  • IT
  • RM
  • EN
Respostas simplas davart la vita en Svizra
  • Tut ils temas
  • Lavur
  • Lavur e famiglia
  • Gravidanza, protecziun da la maternitad e lavur
Tut ils temas
  • Lavur
  • Lavur e famiglia
  • Gravidanza, protecziun da la maternitad e lavur

Gravidanza, protecziun da la maternitad e lavur

Durant Vossa gravidanza sto Voss patrun prender mesiras da protecziun spezialas per Vus e per Voss uffant betg anc naschì. Dretgs spezials avais Vus er durant la maternitad e durant il temp da tezzar.

Remartga

Vus n’essas betg obligada dad infurmar Voss patrun davart la gravidanza. Sche Vus vulais tuttina far quai, po Voss patrun instradar ils pass necessaris per As garantir ina plazza da lavur segira e protegida.
Tut ils temas
  • DE
  • FR
  • IT
  • RM
  • EN

Voss dretgs a la plazza da lavur

Durant la gravidanza profiteschan dunnas da dretgs spezials a la plazza da lavur. Las mesiras las pli impurtantas che Voss patrun duess prender èn las suandantas:

  • Voss temp da lavur na dastga betg surpassar nov uras per di, er sche Voss contract da lavur prevesa quai.

  • Vus dastgais mo cuntinuar cun lavurs grevas u privlusas, sche Vossa activitad n’è nagina ristga per Vus e per Voss uffant. Voss patrun sto laschar far in'analisa da la ristga per garantir ch’i n’exista nagin privel per Vus e per Voss uffant betg anc naschì.

  • En cas d'ina periclitaziun sto Voss patrun prender mesiras da protecziun adattadas u porscher a Vus in'activitad equivalenta, ma segira e betg memia stentusa.

  • Sche Vus lavurais normalmain tranter las 20.00 e las 06.00, pudais Vus pretender durant ils emprims sis mais da la gravidanza che Vus survegnias ina lavur equivalenta durant il di.

  • Durant las otg emnas avant la naschientscha è la lavur da notg scumandada cumplettamain per dunnas en speranza.

  • Vus stuais avair la pussaivladad d'As metter giu e da ruassar durant il di en ina stanza separada.

Absenza e paja

Sche Vus na pudais betg ir a lavurar durant Vossa gravidanza, survegnis Vus Vossa paja usitada, sche Vus preschentais in attest d’ina media u d’in medi, sco en cas d'ina absenza pervia malsogna.
Vus pudais As perstgisar da la lavur cun infurmar Vossa superiura u Voss superiur. Ma faschai attenziun: Senza in attest d’ina media u d’in medi n’è Voss patrun betg adina obligà da pajar vinavant il salari.
Sche Vus lavurais durant la notg ed il patrun n’As po betg porscher ina lavur equivalenta durant il di, essas Vus dispensada da la lavur e pudais pretender 80 pertschient da Voss salari. Il medem vala per lavurs stentusas u privlusas.
Uschespert che Vus returnais dal congedi da maternitad, avais Vus il dretg da pretender tschertas disposiziuns organisatoricas per proteger Vossa sanadad, per exempel er da tezzar Voss uffant, sche Vus giavischais quai.
En detagl:

  • Vossa lavur quotidiana na dastga betg surpassar nov uras, er sche Voss contract da lavur prevesa quai.

  • Il temp necessari per tezzar u per pumpar giu il latg As sto vegnir mess a disposiziun. Quest temp quinta sco temp da lavur pajà (almain 30 minutas tar in di da lavur da fin a 4 uras; 60 minutas durant in di da lavur da dapli che 4 uras; 90 minutas durant in di da lavur da dapli che 7 uras).

  • Sin dumonda pudais Vus vegnir deliberada da lavurs grevas e privlusas.

Voss patrun na po betg schliar la relaziun da lavur durant Vossa gravidanza ed er betg durant las emprimas 16 emnas suenter la naschientscha da Voss uffant.
El As po dentant disdir en cas che Vus vegnis en speranza durant il temp da prova. Er per motivs gravants (p.ex. en cas d'enguladitsch) pudais Vus vegnir relaschada, u che la disditga succeda en enclegientscha vicendaivla tranter Vus e Vossa superiura u Voss superiur.
Sco lavuranta pudais Vus disdir da tut temp il contract da lavur, er durant la gravidanza e durant il congedi da maternitad.
Resguardai per plaschair: Il bab da l’uffant po vegnir relaschà durant il congedi da paternitad.
Dapli davart il tema protecziun da la maternitad e davart il mund da lavur vegnis Vus a savair en la broschura «Protecziun da la maternitad – infurmaziun per dunnas en speranza, mammas che tezzan lur uffant e pagliolancas en ina relaziun da lavur» dal Secretariat da stadi per l’economia (SECO).
Infurmaziuns davart il congedi da maternitad e da paternitad chattais Vus sin la pagina congedi da maternitad e da paternitad.
Infurmaziuns davart la tgira d’uffants ordaifer la famiglia u davart absenzas a la plazza da lavur pervia da malsogna dals uffants chattais Vus sin la pagina Tgira d’uffants ordaifer la famiglia. 
Ulteriuras infurmaziuns areguard la disditga chattais Vus sin la pagina Disditga.
Tut ils temas

In servetsch da la Confederaziun, dals chantuns e da las vischnancas

Davart ch.chInfurmaziuns giuridicas
Link YoutubeLink Twitter
VoteInfo