Inabilitad da lavurar en Svizra.

En cas da malsogna

Proceder

Sche Vus essas malsauna u malsaun u sche Vus n’As sentis betg bain durant la gravidanza, stuais Vus infurmar uschè spert sco pussaivel Vossa patruna u Voss patrun.

In attestat dal medi stuais Vus per regla mussar pir a partir dal terz di d’absenza. As infurmai tar Vossa patruna u tar Voss patrun, tge regla che vala per Vus.

Sche Vus pudais lavurar mo ad in pensum reducì pervia d’ina malsogna u pervia da la gravidanza, sto la media u il medi inditgar en l’attestat il dumber maximal d’uras che Vus pudais lavurar per di u per emna.

Malsogna e paja

I vala da differenziar tranter dus cas:

Voss patruna u Voss patrun ha fatg per sias emploiadas e ses emploiads ina assicuranza da diaria per persunas malsaunas. Ils pli blers patruns èn assicurads en quella moda. En quest cas survegnis Vus – tut tenor assicuranza – durant 720 u 730 dis da malsogna aifer 900 dis vinavant il salari. Resguardai per plaschair: uschè ditg che vus avais in attestat da malsogna, na dastgais Vus betg lavurar. Sche Vus lavurais tuttina, vegn l’assicuranza a purtar plant e dumandar la restituziun da la diaria per malsauns gia pajada.
Vossa patruna u Voss patrun n’ha fatg nagina assicuranza da diaria per persunas malsaunas. En quest cas sto ella u el As pajar vinavant il salari durant in tschert temp. Durant l’emprim onn d’engaschament importa questa durada trais emnas; la durada s’augmenta culs onns d’engaschament fin ad in maximum da quatter mais. La durada exacta dal pajament cuntinuà dal salari variescha da regiun a regiun.

Malsogna e disditga

Durant il temp che Vus avais in attestat da malsogna, n’As dastga Vossa patruna u Voss patrun betg far disditga. Durant quest uschè numnà termin da bloccada datti ina protecziun cunter la disditga

durant 30 dis en l’emprim onn d’engaschament
durant 90 disa partir dal segund fin tar il tschintgavel onn d’engaschament
durant 180 dis a partir dal sisavel onn d’engaschament

Resguardai per plaschair: Durant il temp da prova As po Vossa patruna u Voss patrun disdir er, sche Vus avais in attestat da malsogna

Sco lavuranta u lavurant pudais Vus disdir er durant che Vus avais in attestat da malsogna.

Sche Vus vegnis malsauna che Vus avais survegnì u inoltrà la disditga, vegn il termin da disditga interrut per il temp che Vus avais in attestat da malsogna. Il termin da disditga cuntinuescha pir cura che Vus pudais puspè lavurar.

Accident

Proceder

Tar in accident stuais Vus infurmar Vossa patruna u Voss patrun uschè spert sco pussaivel, e quai independentamain da la dumonda, sche l’accident è capità durant il temp da lavur u durant il temp liber.

La patruna u il patrun sto infurmar immediatamain sia assicuranza. Questa As trametta in formular, en il qual Vus e Vossa media u Voss medi stuais far indicaziuns davart l’accident e davart Voss stadi da sanadad.

Accident e salari

En Svizra ston las patrunas ed ils patruns assicurar lur emploiadas ed emploiads cunter las consequenzas d’accidents.

A partir dal terz di suenter l’accident survegnis Vus ina diaria che correspunda ad 80 pertschient da Voss salari.

La diaria vegn pajada independentamain da la dumonda, sche l’accident è capità al lieu da lavur (accident da lavur) u durant il temp liber (accident ordaifer la professiun).

Unica excepziun: sche Vus essas emploiada u emploià e sche Voss temp da lavur emnil importa damain che 8 uras, èn assicurads mo ils accidents da lavur ed ils accidents che capitan sin il viadi a la lavur.

Las diarias vegnan pajadas per ina tscherta durada. As infurmai tar Vossa patruna u Voss patrun davart las cundiziuns che valan per Vus.

Resguardai per plaschair: sche Vossa media u Voss medi As declera sco inabla u inabel da lavurar, stuais Vus resguardar quai. Sche Vus lavurais tuttina, vegn l’assicuranza a purtar plant e dumandar la restituziun las diarias gia pajadas.

Accident e disditga

Durant il temp cun attestat da malsogna suenter in accident, n’As dastga Vossa patruna u Voss patrun betg disdir. Durant l’uschenumnà temp da bloccada vala ina protecziun cunter disditga:

durant 30 dis en l’emprim onn d’engaschament
durant 90 disa partir dal segund fin il tschintgavel onn d’engaschament
durant 180 dis a partir dal sisavel onn d’engaschament

Resguardai per plaschair:

Durant il temp da prova As dastga Vossa patruna u Voss patrun er disdir, sche Vus avais in attestat da malsogna pervia d’in accident.

Sco lavuranta u lavurant pudais Vus er disdir durant il temp che Vus As revegnis d’in accident.

Sche Vus avais in accident suenter che Vus avais survegnì la disditga, vegn il termin da disditga interrut per il temp che Vus avais in attestat da malsogna. Il termin da disditga cuntinuescha pir cura che Vus pudais puspè lavurar.

Ulteriuras infurmaziuns e contacts

Sin las paginas d’internet dal Secretariat da stadi per l’economia (SECO) chattais Vus ulteriuras infurmaziuns davart la disditga, la protecziun cunter la disditga ed il temp da bloccada e davart l’inabilitad da lavurar.

Per ulteriori informazioni per i lavoratori indipendenti, consultate la pagina Indipendenza professionale.

La pagina Protezione della donna incinta e della madre al lavoro fornisce dettagliate informazioni dettagliate a questo proposito.

Per informazioni relative ai casi di invalidità potete consultare la pagina Assicurazione invalidità.

Infurmaziuns per persunas cun activitad da gudogn independenta chattais Vus sin la pagina Independenza professiunala.

Sin la pagina Protecziun da dunnas en speranza e da mammas a la lavur chattais Vus infurmaziuns detagliadas davart il tema correspundent.

Tschertga

Inabilitad da lavurar