Temais Vus da survegnir ina multa, perquai che Vus essas ida u ì memia svelt cun auto? Avais Vus dumondas davart la decleraziun da taglia? Vulais Vus lantschar in referendum u evitar che Voss souvenirs da vacanzas vegnian retegnids a la duana? Il portal ch.ch As gida tar questas ed anc tar fitg bleras autras dumondas.
Ils texts dal portal vegnan redigids uschia, che las infurmaziuns èn chapaivlas per l’entira populaziun. Perquai vegni duvrà ina lingua simpla e chapaivla per la vasta publicitad – senza jargon d’administraziun. La purschida stat a disposiziun en las quatter linguas uffizialas ed en englais.
L’onn 2021, pia 15 onns suenter ch’il portal è vegnì mess en la rait, vegn el suttamess ad ina cura da regiuvinaziun tecnica e redacziunala. Cun ina cumparsa moderna ed attractiva spera ch.ch da pudair satisfar anc meglier a Voss basegns.
Il portal è orientà meglier a la navigaziun sin ils apparats mobils e concepì uschia, che las maschinas da tschertga usitadas preschentan ils cuntegns en moda pli optimala.
Ils 22 d'october 2023 han lieu las elecziuns per la renovaziun totala da las duas chombras dal parlament federal svizzer. Il portal ch.ch/elecziuns2023 porscha numerusas infurmaziuns utilas, en spezial davart la procedura da candidatura per il Cussegl naziunal u per il Cussegl dals chantuns, davart las modalitads da votar u davart ils resultats da las elecziuns en mintga chantun.
Las infurmaziuns da ch.ch davart las elecziuns federalas èn il resultat da la collavuraziun tranter la Chanzlia federala, ils Servetschs dal Parlament, l'Uffizi federal da statistica ed ils chantuns.
Per dumondas u propostas davart las elecziuns federalas 2023: Feedback.ch.ch-Wahlen2023@ch.ch
ch.ch respecta las directivas da la Confederaziun davart las paginas d’internet senza barrieras. Dapli infurmaziuns chattais Vus sin la pagina da la Chanzlia federala.
ch.ch è in portal cuminaivel da la Confederaziun, dals chantuns e da las vischnancas. Responsabel per il cuntegn, per il concept e per la gestiun è la Chanzlia federala.
Chanzlia federala
Secziun communicaziun
Chasa federala vest
3003 Berna
E-mail: feedback@ch.ch
Per colliar Vossas paginas cun il portal pudais Vus duvrar il logo dal portal.