Sche Vus vegnis en Svizra, stuais Vus annunziar als cunfins la rauba transportada d’ina valur da passa 150 francs sco er victualias, alcohol u tubac che surpassan las valurs fixadas per quests products.
Sche Vus na pajais betg ils dazis correspundents, po la rauba vegnir confiscada. Las formalitads da duana èn descrittas sin la pagina davart il turissem da cumpra.
Animals
Las formalitads da duana varieschan tut segund sche Vus vulais importar en Svizra in chaun, tgirom-luschard u rauba che deriva d’animals. En cas che Vus vulais savair dapli, consultai las prescripziuns spezialas davart l’import d’animals, davart products d’animals u davart la protecziun da las spezias.
Plantas
Attenziun cun souvenirs da vacanzas: En blers cas èsi scumandà d’importar plantas, fritgs, legums, fluras da tagl, sems u autras parts da plantas viventas en Svizra. Terra e tschertas sorts da laina èn medemamain pertutgadas.
En cas che Vus vulais savair dapli, consultai las prescripziuns davart l’import da plantas, da fluras da tagl e davart la protecziun da las spezias u las infurmaziuns davart la sanadad da las plantas.
Numerus tips d’armas na dastgan betg vegnir importads en Svizra. Armas e muniziun stuais Vus annunziar tar in post da duana avert.
Per quests products na ston vegnir pajads nagins dazis. Persuenter sto vegnir pajada ina taglia sin la plivalur (8,1 %).
Ulteriuras infurmaziuns davart l’import d’armas e davart las permissiuns necessarias chattais Vus sin la pagina d’internet da l’Uffizi federal da la duana e da la segirezza dals cunfins sco er sin la pagina Armas da ch.ch.
Vus pudais traversar in cunfin svizzer cun in vehichel emprestà. Per evitar che Vus vegnias suspectada u suspectà d’enguladitsch, vegni recumandà da purtar cun sai in'autorisaziun en scrit da la proprietaria u dal proprietari dal vehichel. Per quest intent pudais Vus chargiar giu online in formular da permissiun correspundent.
Sche Vus avais Voss domicil en Svizra, n’avais Vus da princip betg il dretg d’utilisar vehichels senza pajar dazis en Svizra. L’Uffizi federal da la duana e da la segirezza dals cunfins porscha dapli infurmaziuns davart l’utilisaziun temporara en Svizra d’in vehichel senza pajar dazis.
Vus pudais traversar il cunfin svizzer cun uschè blers daners bluts (daners bluts e vaglias) sco che Vus vulais. Sche Vus entrais dentant cun almain 10 000 francs svizzers u en cas da suspect, pon las duanieras ed ils duaniers As interrogar.
Vossas respostas vegnan registradas en il sistem d’informatica da l’Uffizi federal da la duana e da la segirezza dals cunfins. En cas da suspect da la lavada da daners u da la finanziaziun dal terrorissem pon ils daners bluts vegnir confiscads provisoricamain e surdads a la polizia.
Ulteriuras infurmaziuns chattais Vus sin la pagina Daners bluts, valuta estra, vaglias.
Per planisar Vossa entrada en Svizra consultai las adressas e las uras d’avertura dals cunfins e dals posts da duana.
La broschura illustrada Info duana cuntegna tut las infurmaziuns impurtantas davart la duana per persunas privatas.
La pagina d’internet da l'Uffizi federal da la duana e da la segirezza dals cunfins porscha infurmaziuns per persunas privatas, tranter auter er dumondas frequentas (FAQ) davart il dazi per importar in vehichel.
Sin ch.ch chattais Vus ulteriuras infurmaziuns davart ina dischlocaziun en Svizra e davart las formalitads da duana en cas da cumpras a l’exteriur.