Tschertga

Al cuntegn
Siglia al cuntegn da la paginaSiglia a la navigaziunSiglia a la tscherna da la linguaSiglia a la tscherna da la linguaRespostas simplas davart la vita en Svizra
  • DE
  • FR
  • IT
  • RM
  • EN
Respostas simplas davart la vita en Svizra
  • Tut ils temas
  • Segirezza e dretg
  • Posseder armas en Svizra
Tut ils temas
  • Segirezza e dretg
  • Posseder armas en Svizra

Posseder armas en Svizra

La lescha davart las armas regla, tgi che dastga posseder in’arma en Svizra. Per cumprar in’arma duvrais Vus – tut tenor l’arma – in contract, ina permissiun d’acquistar armas u ina permissiun excepziunala.

Remartga

In’arma da fieu en chasa augmenta il ristg d’in accident, d’in suicidi u d’in delict da violenza.
Vus pudais deponer in’arma ch’As appartegna e ch’è registrada legalmain tar ina ferrera u tar ina ferrer d’armas.
Sche Vus n’essas betg segira u segir a tgi che l’arma appartegna, contactai il biro chantunal d’armas.
Tut ils temas
  • DE
  • FR
  • IT
  • RM
  • EN
La Lescha d’armas regla l’utilisaziun d’armas en Svizra: per exempel tge objects che valan sco arma, tgi che dastga cumprar armas e tge permissiun ch’i dovra. Ultra da quai vegn reglà co che las armas duain vegnir magasinadas e transportadas. La lescha cuntegna disposiziuns spezialas per collecturas e collecturs, per chatschadras e chatschaders sco er per tiraduras e tiradurs da sport.
Sco armas valan en Svizra tranter auter tut las armas da fieu, stilets ed ulteriurs geners da cuntels, tscherts sprays da defensiun ed apparats d’electroschoc. Er pistolas d’aria cumprimida, pistolas da CO2, pistolas d’imitaziun, pistolas d’alarm e pistolas da softair valan sco armas. Savens èn questas pistolas opticamain fitg sumegliantas a vairas armas, perquai vegnan ellas adina puspè utilisadas per delicts.
Sche Vus cumprais, regalais, ertais, prendais en locaziun u emprestais in’arma, vala quai tenor la lescha sco «acquist».

Acquistar in’arma sco persuna privata

Sco burgaisa u burgais svizzer dastgais Vus da princip acquistar in’arma sche:

  • Vus avais almain 18 onns;

  • Vus n’essas betg sut curatella cumplessiva u sche Vus na vegnis betg represchentada u represchentà d’ina mandataria u d’in mandatari;

  • Vus na dais betg motiv per supponer che Vus pericliteschias cun l’arma Vus sezza u sez u terzas persunas;

  • Vus n’essas betg registrada u registrà en il register penal pervia d’acts violents u privlus per il public u pervia da delicts u surpassaments repetids.

Acquistar in’arma sco persuna da l’exteriur 

  • Sche Vus n’avais nagina permissiun da domicil, duvrais Vus ina permissiun d’acquistar armas per tut las armas.

  • Burgaisas e burgais da tscherts stadis na dastgan da princip acquistar naginas armas u parts d’armas en Svizra.

La lescha divida las armas en trais categorias: armas suttamessas a l’annunzia obligatorica, armas suttamessas ad in’autorisaziun ed armas scumandadas. Tut tenor il gener da l’arma duvrais Vus in contract, ina permissiun d’acquistar armas u ina permissiun excepziunala.
Gener da l’arma
Necessari per l’acquist

Armas suttamessas a l’annunzia obligatorica sco p.ex. armas a repetiziun per la chatscha, armas per mazzar cunigls, armas da softair, pistolas d’alarm, armas da paintball e.u.v.

Armas suttamessas ad in’autorisaziun sco p.ex. pistolas, revolvers e schluppets mez automatics cun magasin pitschen

Dumonda online per la permissiun d’acquistar armas

Armas scumandadas sco p.ex. armas da fieu mez automaticas cun magasin grond, mitraglias, apparats d’electroschoc, stilets, cuntels automatics, cuntels a spler, petschiers

Sportistas e sportists u collecturas e collecturs dastgan acquistar intginas da las armas numnadas cun ina permissiun excepziunala dal biro chantunal d’armas.

Sche Vus vulais importar in’arma en Svizra, stuais Vus dumandar ina permissiun d’import tar l’Uffizi federal da polizia (fedpol). Tut tenor l’arma giavischada duvrais Vus ultra da quai ina permissiun d’acquist d’armas u ina permissiun excepziunala. Tar l’entrada stuais Vus annunziar l’arma ad in post da duana cun la permissiun d’import. Il passaport europeic d’armas n’è nagina substituziun per ina permissiun d’import.

Importar armas per in viadi da chatscha u per ina concurrenza da sport da tir

Sche Vus importais sco chatschadra u chatschader u sco tiradura u tiradur da sport armas da stadis da Schengen per ina chatscha u per in’occurrenza da sport, na duvrais Vus nagina permissiun d’import. Vossa arma sto dentant esser registrada en il passaport europeic d’armas da fieu e Vus stuais pudair mussar in invit per l’occurrenza correspundenta. En cas da dumondas davart l’import d’armas, As drizzai al post central d’armas dal fedpol.

Tge stoss jau resguardar, sche jau empost in’arma d’ina/en ina butia online a l’exteriur?

Resguardai ch’ina arma po esser legala en in tschert stadi, dentant betg en Svizra. Scleri, sche Vus duvrais ina permissiun, avant che Vus empustais in’arma en ina butia online a l’exteriur. Considerai, ch’ina butia en l’internet cun la finiziun .ch na sto betg exnum avair il domicil en Svizra. En cas d’intschertezzas, As drizzai per plaschair a Voss biro chantunal d’armas u al post central d’armas.
Loading...
    Sche Vus vulais purtar in’arma en in lieu public, duvrais Vus ina permissiun per purtar in’arma.
    «Per transportar armas – per exempel sco chatschadra en viadi vers il revier u sco tiradur da sport en viadi vers il stan da tir – na duvrais Vus nagina permissiun. Tar il transport na dastga sa chattar nagina muniziun en l’arma u en ils magasins.»
    Per proteger Vus sezza u sez ed autras persunas èsi impurtant, che Vus tegnias en salv a moda segira Vossa arma e la muniziun; il meglier en ina stgaffa d’armas ch’ins po serrar cun la clav. Sche Vus perdais in’arma, essas Vus obligada u obligà d’annunziar immediatamain la perdita a la polizia.

    • Armas e la lescha: quai stuais Vus savair (Prevenziun svizra da la criminalitad)

    • Armas e violenza cun armas (Prevenziun svizra da la criminalitad)

    • Acquistar in’arma sco persuna privata (Uffizi federal da polizia fedpol)

    • Dumondas frequentas e respostas davart il nov dretg d’armas (Uffizi federal da polizia fedpol )

    • Dumondas e formulars (Uffizi federal da polizia fedpol)

    • Fegl d’infurmaziun davart armas d’imitaziun, d’alarm e da soft air sin la pagina d’internet da l’Uffizi federal da polizia fedpol (en tudestg).

    Tut ils temas

    In servetsch da la Confederaziun, dals chantuns e da las vischnancas

    Davart ch.chInfurmaziuns giuridicas
    Link YoutubeLink Twitter
    VoteInfo