Import da rauba en Svizra
Rauba dastga vegnir importada en Svizra senza stuair pajar la taglia sin la plivalur, sche la valur totala na surpassa betg 150 francs. Sche questa valur vegn surpassada, stuais Vus pajar la taglia sin la plivalur svizra per la valur totala da la rauba.
Per victualias, per bavrondas alcoholicas e per products da tubac sto ultra da quai vegnir resguardada la quantitad da rauba che dastga vegnir importada. Sche la quantitad definida vegn surpassada, stuais Vus pajar dazi.
Exempels per quantitads da rauba che dastgan vegnir importadas en Svizra senza stuair pajar dazi:
<18 % alcohol: 5 liters per persuna e per di
>18 % alcohol: 1 liter per persuna e per di
charn: 1 kg per persuna e per di
cigarettas: 250 cigarettas per persuna e per di
Sche Vus importais en Svizra rauba cumprada a l’exteriur, pudais Vus savens laschar restituir la taglia estra sin la plivalur.
Adatg, i dat rauba ch’è delicata tar l’import en Svizra.
Transit da rauba / sortida da la Svizra
Sche Vus vulais sulettamain passar tras la Svizra cun Vossa rauba privata, stuais Vus annunziar questa rauba tar il passagi dal cunfin en Svizra. En cas che Vus stuais lura pajar dazis, survegnis Vus enavos la summa (en francs svizzers), cura che Vus bandunais la Svizra.
Sche Vus bandunais simplamain la Svizra cun rauba privata, na stuais Vus emplenir naginas formalitads da duana spezialas. N’emblidai dentant betg d’As infurmar davart las prescripziuns d’import en Voss pajais da destinaziun.
Ils dazis èn fitg differents. Sche Vus surpassais las quantitads libras da dazi tar victualias, tar bavrondas alcoholicas u tar products da tubac, dependan ils dazis da la quantitad che surpassa la quantitad libra. Intgins exempels:
Importar rauba en Svizra
Las suandantas indicaziuns valan mintgamai per persuna e per di, per raubas che Vus importais per il diever privat u per regalar.
App «QuickZoll»
«QuickZoll» è in’app da dazi dal Uffizi federal da la duana e da la segirezza dals cunfins per il traffic da viadi privat. Cun questa app pudais Vus annunziar Vossa rauba per l’import e pajar directamain las taxas resultantas. La rauba declerada cun «QuickZoll» pudais Vus silsuenter importar sur in cunfin tenor plaschair. Vus pudais chargiar giu gratuitamain l’app «QuickZoll» sin Voss telefonin. Per il diever na dovri nagina registraziun.
Decleraziun a bucca a la duana
Sch’il post da cunfin svizzer è occupà cun persunal da duana, stuais Vus annunziar tut la rauba senza vegnir intimada u intimà. Sin ils eroports duvrais Vus per quai ils passagis cotschens per «Annunziar rauba».
Sche Vus viagiais cun il tren, pudais Vus annunziar a bucca Vossa rauba tar il persunal da duana en il tren. Sche nagin persunal da duana n’è en il tren, pudais Vus annunziar Vossa rauba entaifer set dis suenter l’arriv en Svizra tar x-in post da duana durant las uras d’avertura inditgadas.
Annunzia autonoma en scrit
Sche Vus vegnis en Svizra sur in cunfin betg occupà, pudais Vus annunziar Vossa rauba en scrit cun emplenir il formular che stat a disposiziun al cunfin en la boxa d’annunzia. Questa decleraziun a la duana n’è dentant betg pussaivla per rauba previsa per il commerzi.
Sche Vus importais en Svizra rauba cumprada a l’exteriur, pudais Vus savens laschar restituir la taglia estra sin la plivalur.
L'Uffizi federal da la duana e da la segirezza dals cunfins n’è però betg responsabel per questa restituziun e na po dar nagins scleriments davart questa restituziun.
Responsabel è il vendider ester u ina interpresa da «tax refund». Las reglas da restituziun varieschan tut il tenor pajais. Per il solit As surdat il vendider in formular da restituziun, nua che l’autoritad da duana estra sto confermar l’import da la rauba en Svizra.
Sche la rauba importada surpassa ina valur totala da 150 francs, sto vegnir pajada la taglia sin la plivalur svizra tar l’import en Svizra, er sche la taglia estra sin la plivalur na vegn betg restituida.
La broschura illustrada Info duana cuntegna tut las infurmaziuns impurtantas davart il dazi per persunas privatas.
L'Uffizi federal da la duana e da la segirezza dals cunfins porscha infurmaziuns detagliadas davart l’import en Svizra, las quantitads libras e las valurs libras.
Per viadis cun il tren valan cundiziuns spezialas per la decleraziun a la duana.
Per planisar Voss viadi resguardai per plaschair las adressas e las uras d’avertura dals passagis dal cunfin e dals posts da duana.
Per cumprar rauba en l’internet pudais Vus consultar la suandanta pagina sin ch.ch: Empustar rauba a l’exteriur.