En general èsi da pajar dazis sco er la taglia svizra sin la plivalur (TPV) per mintga spediziun da rauba da l’exteriur.
En la plipart dals cas paja il speditur mo ils custs da transport. Ils dazis, la TPV ed ils custs da duana van automaticamain a quint da la retschavidra u dal retschavider, sch’il speditur n’ha betg notà explicitamain autras cundiziuns da commerzi sin las scrittiras accumpagnantas.
En la pratica na vegnan ils imports da taglia fin 5 francs betg mess a quint. Vus pudais pia evitar da pajar questa taglia, sche la valur dal pachet (inclusiv custs da transport e d’emballadi) na surpassa betg 193 francs per rauba ch'è suttamessa a la TPV reducida da 2,6 % (p.ex. cudeschs) respectivamain 62 francs per rauba ch'è suttamessa a la TPV da 8,1 %.
Sche Vus survegnis in regal d’ina persuna privata a l'exteriur d’ina valur da maximalmain 100 francs, na stuais Vus pajar naginas taxas. Questa excepziun na vala dentant betg per tubac e per alcohol. Spediturs ston declerar spediziuns da regals sco talas.
La summa po variar fermamain. Sco retschavidra u retschavider d’ina spediziun da pachets en Svizra stuais Vus pajar ils suandants custs:
la taglia sin la plivalur da la rauba (inclusiv ils custs da spediziun e ils dazis)
ils dazis sin il pais brut
autras taxas sco per exempel la taglia sin il tubac u sin spirituosas
ils custs per il transport da la rauba
En il traffic postal u da currier liquideschan ils transportaders (p.ex. la Posta, DHL, UPS) las formalitads da duana. Els pretendan ina indemnisaziun correspundenta che po variar tut tenor il pajais d’origin da la rauba. La Posta svizra pretenda almain 11.50 francs u maximalmain 70 francs per il dazi. Ella ha publitgà las dumondas frequentas (FAQ) davart l’import da la spediziun da pachets.
Sche Vossa rauba empustada online n’arriva betg, As drizzai al vendider da la rauba a l’exteriur u al servetsch da clientella dal transportader. En cas da talas dumondas na po l’Uffizi federal da la duana e da la segirezza dals cunfins betg gidar. Las plattafurmas da vendita online tramettan per regla ina communicaziun cun in link. Sur quest link pudais Vus suandar en temp real la via da la rauba empustada fin tar Vus.
Sin sia pagina d’internet porscha la Posta infurmaziuns ed in video explicativ davart il dazi da spediziuns d’import.
Ulteriuras infurmaziuns da la Posta chattais Vus en las dumondas frequentas (FAQ) davart ils custs d’import da spediziuns da pachets.
L’Uffizi federal da la duana e da la segirezza dals cunfins porscha ulteriuras infurmaziuns davart cumpras en l’internet e davart spediziuns da posta e da currier.
Tar l’Uffizi federal da la duana e da la segirezza dals cunfins chattais Vus las tariffas da la taglia sin la plivalur tut tenor product.
Sin ch.ch chattais Vus ulteriuras infurmaziuns davart il turissem da cumpra a l’exteriur.