Suenter il stgalim secundar I sa decida la gronda part dals giuvenils per ina furmaziun fundamentala professiunala. L’emprendissadi po vegnir absolvì en in manaschi ubain en ina scola (a temp cumplain). La furmaziun fundamentala professiunala succeda per gronda part tenor in sistem dual: La furmaziun pratica professiunala en in manaschi d’emprendissadi vegn cumplettada cun l’instrucziun teoretica en ina scola professiunala spezialisada. En la vegliadetgna da 18/19 onns acquistan ils giuvenils in certificat final correspundent.
Ina scolaziun fundamentala da trais u quatter onns pudais Vus er cumplettar cun ina maturitad professiunala reconuschida da la Confederaziun. Cun quella pudais Vus studegiar senza far in examen d’admissiun en ina scola auta professiunala.
Ils gimnasis e las scolas medias spezialisadas fan part dals studis da furmaziun generala. Els na qualifitgeschan betg per la professiun e preparan per studis a las scolas autas (stgalim terziar).