En Svizra datti trais differents tips da scolas autas.

A l'universitad emprendais Vus las basas scientificas da Voss rom. In'universitad èn er la Scola politecnica federala Turitg (ETHZ) e la Scola politecnica federala Losanna (EPFL). La via directa per in studi a l'universitad va sur la maturitad ad in gimnasi.

En in studi ad ina scol'auta spezialisada emprendais Vus en moda pratica. La via directa per in studi ad ina scol'auta spezialisada va sur ina maturitad professiunala u sur ina maturitad spezialisada.

Las scolas autas da pedagogia scoleschan en emprima lingia magistras e magisters.

En la survista da las purschidas da studi chattais Vus tut ils studis che Vus pudais eleger a las universitads ed a las scolas autas en Svizra.

Sche Vus vulais cumparegliar la qualitad da las differentas universitads, As gidan uschenumnads rankings da las universitads.

Vus pudais As immatricular directamain ad ina scol'auta. Sin la pagina d'internet da la Conferenza dals recturs da las scolas autas svizras chattais Vus las adressas da las scolas autas ed ils termins d'annunzia per il studi.

Per la gronda part dals studis n'èn las plazzas betg limitadas. Excepziuns datti spezialmain per ils studis da medischina (access cun test da qualificaziun reussì), chiropratica sco er scienzas da sport e scienzas da moviment.

Er las scolas autas spezialisadas han in dumber limità da plazzas en tscherts studis. Infurmaziuns detagliadas survegnis Vus da las scolas autas.