Premissas per stipendis chantunals
Vus essas en scolaziun u studegiais ad in'universitad u ad ina scol'auta spezialisada ed avais paucs daners? Alura pudais Vus inoltrar al post chantunal da stipendis ina dumonda per in stipendi ed As infurmar là davart ils detagls.
Sut tschertas cundiziuns survegnis Vus in stipendi per persunas creschidas u per giuvenils. Ina da las premissas è, che Vus hajas u che Voss geniturs hajan mo in pitschen salari u ina pitschna facultad. En detagl sa differenzieschan las premissas d'in chantun a l'auter. Singuls chantuns concedan er in sustegn finanzial per ina segunda scolaziun u per ina furmaziun supplementara.
Variantas da contribuziuns chantunalas
Stipendis survegnis Vus in'unica giada u er pliras giadas. Da princip n'als stuais Vus betg pajar enavos. Intgins chantuns spetgan dentant che Vus restitueschias ils stipendis, sche Vus vivais pli tard en bunas relaziuns finanzialas.
Emprests da scolaziun stuais Vus pajar enavos pli tard. Mintgatant stuais Vus er pajar in tschains per in tal credit da studi.
Er la Confederaziun, las vischnancas u las scolas autas gidan en tscherts cas. Vitiers vegnan numerusas fundaziuns privatas e fonds. Ils posts chantunals da stipendis disponan d'adressas da fundaziuns e da fonds privats che porschan sustegn finanzial. La Confederaziun fa ina glista da las fundaziuns per contribuziuns da studi.
Vus essas ina perscrutadra u in perscrutader a l'exteriur cun in diplom da master u cun in titel da docter? Ubain ina artista estra u in artist ester cun in diplom da bachelor? E Vus vulais vegnir en Svizra? Alura pudais Vus As annunziar per in uschenumnà stipendi d'excellenza da la Confederaziun. Vossa dumonda pudais Vus inoltrar al Secretariat da stadi per furmaziun, retschertga ed innovaziun.
Stipendis d'excellenza da la Confederaziun per studentas e students esters e per artistas ed artists esters
Video:Tge èn stipendis d'excellenza da la Confederaziun? (englais)
Stipendis – infurmaziuns per Svizras e Svizzers a l'exteriur (educationsuisse)