Tge èn uras supplementaras?
En Voss contract da lavur è fixà quantas uras che Vus stuais lavurar per emna.
Sche Vus lavurais dapli ch’il dumber dad uras fixadas en il contract, na surpassais dentant betg il temp da lavur maximal per emna, valan questas ulteriuras uras lavuradas sco uras supplementaras. Il temp da lavur maximal per emna importa:
45 uras per lavurantas e lavurants en manaschis industrials sco er per il persunal da biro, per emploiadas tecnicas ed emploiads tecnics e per il persunal da la vendita en manaschis gronds dal commerzi en detagl;
50 uras per las lavurantas ed ils lavurants restants.
Tge premissas valan per prestar uras supplementaras?
Sche Vossa patruna u Voss patrun pretenda che Vus prestias uras supplementaras u sche Vus prestais voluntarmain uras supplementaras, ston las suandantas premissas esser accumplidas:
Las uras supplementaras èn necessarias.
Las uras supplementaras n'èn fisicamain e psichicamain betg memia strapatschantas.
Las uras da lavur ed il temp da paus quotidian vegnan resguardads.
Co vegnan indemnisadas las uras supplementaras?
Uras supplementaras ston vegnir indemnisadas cun in supplement da paja da 25 pertschient.
Enstagl cun in supplement da paja pon uras supplementaras dentant er vegnir cumpensadas tras temp liber d'almain la medema durada. Quai premetta dentant Vossa approvaziun ed ina cunvegna en scrit tranter Vus e Vossa patruna u Voss patrun.
Collavuraturas e collavuraturs da cader na pon per regla betg pretender in supplement da paja. Quai sto dentant vegnir reglà en mintga cas en il contract da lavur. I po er vegnir fixà en scrit che las uras supplementaras vegnian indemnisadas senza supplement u cun in supplement da main che 25 pertschient.
Tge èn sururas?
La lescha prevesa in temp da lavur maximal per emna:
45 uras per lavurantas e lavurants en manaschis industrials sco er per il persunal da biro, per emploiadas tecnicas ed emploiads tecnics e per il persunal da la vendita en manaschis gronds dal commerzi en detagl;
50 uras per las lavurantas ed ils lavurants restants.
Sche Vus lavurais dapli ch’il temp da lavur maximal fixà tras lescha, prestais Vus sururas.
Tge premissas valan per prestar sururas?
Lavurar pli ditg ch’il temp da lavur maximal dastgan ins:
sche la lavur fa prescha u sch'i resulta extraordinariamain blera lavur;
per inventarisaziuns, per clusiuns da quints e per lavurs da liquidaziun;
per evitar u eliminar disturbis dal manaschi.
I na dastgan betg resultar dapli che duas sururas per di.
Per onn na dastgan betg resultar dapli che 170 sururas (tar in temp da lavur maximal da 45 uras per emna) respectivamain dapli che 140 uras (tar in temp da lavur maximal da 50 uras).
Co vegnan indemnisadas las sururas?
Per sururas vegn pajà in supplement da paja d'almain 25 pertschient. Ins po sa cunvegnir che las sururas vegnan cumpensadas tras temp liber enstagl cun in supplement da paja; la cumpensaziun succeda en quest cas tras temp liber da la medema durada entaifer 14 emnas u entaifer ina perioda che Vus concludais cun Vossa patruna u Voss patrun (questa perioda na dastga dentant betg surpassar 12 mais).
Per emploiadas ed emploiads da biro e per intginas ulteriuras categorias da lavurantas e lavurants na vegn debità nagin supplement per las emprimas 60 sururas.
Sche Vus essas pli giuvna u pli giuven che 18 onns, na dastgais Vus betg lavurar dapli uras che las autras collavuraturas ed ils auters collavuraturs dal manaschi. Il temp da lavur quotidian na dastga en nagin cas importar dapli che nov uras e sto sa chattar – ensemen cun las pausas – entaifer dudesch uras.
Ils dis frequentads en la scola professiunala valan sco temp da lavur
Sin la pagina d’internet dil Secretariat da stadi per l’economia (SECO) chattais Vus respostas a las dumondas las pli frequentas davart las uras supplementaras e davart las sururas.