Il permiss da manischar internaziunal è ina «translaziun» d'in permiss da manischar naziunal per manar vehichels a l’exteriur. Perquai è el mo valaivel ensemen cun in permiss da manischar naziunal. Vus stuais pia adina mussar omadus documents valaivels.
Vus avais in permiss da manischar svizzer
Il permiss da manischar internaziunal vegn recumandà per manar vehichels en tut ils pajais ordaifer la UE e la AECL. Blers pajais e blers locaturs d'autos pretendan schizunt il permiss da manischar internaziunal.
As infurmai – avant che cumenzar il viadi – tar il biro da viadi, tar il consulat responsabel u tar in’uniun per il traffic sin via, tge documents da viadi che Vus duvrais per il pajais correspundent.
En ils pajais da la UE e da la AECL basta il permiss da manischar en il format da carta da credit. En cas che Vus possedais anc in vegl permiss da manischar blau, pudais Vus simplamain barattar quel tar l'uffizi per il traffic sin via da Voss chantun.
Vus avais in permiss da manischar da l’exteriur
En cas che Vus abitais a l’exteriur, duvrais Vus in permiss da manischar internaziunal per manar vehichels en Svizra mo, sche las categorias da vehichels da motor, che Vus dastgais manischar, n’èn betg inditgadas en scrittira latina sin Voss permiss da manischar da l’exteriur.
Sche Vus abitais en Svizra, stuais Vus barattar en tscherts cas Voss permiss da manischar cun in permiss da manischar svizzer.
Vus pudais empustar il permiss da manischar tar l’uffizi per il traffic sin via da Voss chantun da domicil.
En intgins chantuns pudais Vus empè da quai er As drizzar a l’Automobil Club da la Svizra u al Touring Club Svizra. Là vegnis Vus er a savair, tge documents che Vus stuais inoltrar.
Il permiss da manischar internaziunal vala per trais onns, dentant betg pli ditg che la durada da valaivladad dal permiss da manischar naziunal.
Il permiss da manischar na po betg vegnir prolungà. Suenter la scadenza da sia valaivladad pudais Vus dentant empustar in nov.
Ils custs dal permiss da manischar internaziunal varieschan da chantun a chantun. Quintai cun ina summa da duas cifras.
As drizzai a l'uffizi per il traffic sin via da Voss chantun.
Sin ch.ch chattais Vus er ina pagina davart il barat dal permiss da manischar.