Cun ina disposiziun dal pazient pudais Vus definir, tge tractament medicinal che Vus giavischais suenter in grev accident u durant il stadi final d’ina malsogna e tgenin betg.
Cun quai garantis Vus che Vossa voluntad sco pazienta u pazient vegn er resguardada, cura che Vus na pudais betg pli exprimer Vossa voluntad.
Vus n’essas betg obligada u obligà da far ina disposiziun dal pazient. La disposiziun è persunala e gratuita. Vus pudais far e midar ina tala disposiziun da tut temp.
Vus pudais eleger tranter duas sorts da disposiziuns dal pazient: ina che sa concentrescha sin l’essenzial ed ina che definescha tut tenor la situaziun, tge mesiras medicinalas che dastgan vegnir prendidas. Vus agis suandantamain:
Chargiai giu in model, per exempel il formular da la Federaziun dals medis svizzers (FMH) en la versiun curta u detagliada. Er numerusas autras uniuns porschan exempels e models.
Empleni il model tschernì, mettai la data e suttascrivai il model.
Surdai la disposiziun dal pazient ad ina persuna da confidenza ubain a la media u al medi da chasa. Vus pudais er inditgar, nua ch’il team da tractament chatta il document en cas da basegn.
Tegnai en Vossa bursa ina indicaziun pertutgant Vossa disposiziun dal pazient e pertutgant il lieu da deposit. Vus pudais er laschar registrar il lieu da deposit sin la carta d’assicuranza.
Na targlinai betg d’As laschar cussegliar per emplenir il model – per exempel d’ina media u d’in medi ch'è responsabel per Vus. Ina clera disposiziun dal pazient che correspunda a Voss giavischs ha – en cas d’ina decisiun – dapli paisa e chaschuna main dumondas d’interpretaziun.
La disposiziun dal pazient duess vegnir examinada regularmain e vegnir adattada en cas da basegn. La FMH recumonda da far mintga dus onns in’examinaziun. N’emblidai betg da metter la data e da suttascriver la nova versiun.
Vus na stuais betg exnum esser sauna u saun sco in pesch, ma Vus stuais esser abla u abel da giuditgar.
La disposiziun dal pazient sto correspunder a Vossa vaira voluntad e na duess betg vegnir fatga sut pressiun.
Per las medias ed ils medis responsabels èn liantas mo disposiziuns dal pazient, sche quellas portan ina data ed èn suttascrittas a maun.
Models da la Federaziun dals medis svizzers (FMH) (versiun curta u detagliada)
Infurmaziuns davart la disposiziun dal pazient e davart la cussegliaziun correspundenta da la Societad svizra da medischina e tgira palliativa