Uras supplementaras e sururas

Sch'il temp da lavur normal, ch'è fixà en il contract da lavur, vegn surpassà fin al temp da lavur emnil maximal (tut tenor la branscha 45 fin 50 uras), discurran ins dad uras supplementaras. Sco persuna emploiada essas Vus obligà da prestar uras supplementaras, sche:

• quellas èn necessarias
• quellas n'èn betg ina surpretensiun fisica e psichica per Vus
• quellas èn pussaivlas e
• las uras da lavur e da paus vegnan observadas

• Las uras supplementaras ston vegnir indemnisadas cun in supplement da 25 %.
• Igl è dentant pussaivel d'excluder en scrit il supplement.
• Empè d'in pajament pon las uras supplementaras er vegnir cumpensadas tras temp liber d'almain la medema durada. Quai premetta dentant Voss consentiment sco er il consentiment da Voss patrun.
• Per ils collavuraturs dal cader n'è il temp da lavur per il solit betg definì exactamain tenor uras. Ins parta dal fatg che la prestaziun d'in pensum pli grond vegnia indemnisada tras la paja pli auta, ma quai sto vegnir reglà en il contract da lavur. En scrit poi er vegnir fixà che las uras supplementaras vegnian indemnisadas senza supplement u cun in supplement da main che 25 %.

Da sururas discurran ins, sch'il temp da lavur emnil maximal tenor lescha vegn surpassà (tut tenor la branscha 45 fin 50 uras).

• Las sururas na dastgan betg surpassar 2 uras per di.
• Durant in onn chalendar na dastgan ellas betg surpassar 170 uras (en cas d'in temp da lavur da 45 uras per emna) resp. 140 uras (en cas da 50 uras).
• Ellas ston vegnir indemnisadas cun in supplement da paja da 25 %, nun ch'ellas vegnian gulivadas entaifer in termin fixà tras temp liber.

Exempel:
Ina persuna emploiada presta durant ina tscherta emna 52 uras da lavur. Il temp da lavur maximal en l'interpresa importa 45 uras. Pia ha ella fatg 7 sururas. Sch'ins parta d'in temp da lavur contractual da 40 uras per emna, vegnan anc vitiers 5 uras supplementaras.

Per giuvenils emploiads dastga il temp da lavur per di importar maximalmain 9 uras. E la lavur – inclusiv las pausas – sto vegnir prestada entaifer 12 uras. Tar il temp da lavur ston vegnir quintadas eventualas sururas sco er l'instrucziun obligatorica, sche quella ha lieu durant il temp da lavur.