Las autoritads svizras online

directamain tar il cuntegn

Supplements da famiglia

Infurmaziuns generalas

Per uffants fin 16 onns (per uffants malsauns u per uffants cun in impediment ch'èn incapabels da lavurar fin 20 onns) survegnis Vus in supplement per uffants d'almain 200 francs per uffant e per mais. Per uffants da 16 fin 25 onns en scolaziun avais Vus il dretg d'in supplement da scolaziun d'almain 250 francs per uffant e per mais.


Ils chantuns pon prescriver tariffas pli autas ed ultra da quai introducir supplements da naschientscha e d'adopziun.

Mo in supplement per uffant

Per uffant vegn pajà mo in supplement. Sche tuts dus geniturs lavuran, retira l'uschenumnada "emprima persuna autorisada" ils supplements da famiglia (tgenin dals dus geniturs che quai è, vegn reglà en la lescha). L'auter genitur ha il dretg d'ina differenza, sch'el lavura en in auter chantun ch'il genitur autorisà e sch'ils supplements concedids tras lescha èn là pli auts.

Vus abitais en Svizra

  • Lavurantas e lavurants sco er persunas cun activitad da gudogn independenta che abitan en Svizra e che gudognan almain 587 francs per mais, han il dretg da supplements da famiglia.
  • Persunas senza activitad da gudogn han da princip il dretg da supplements da famiglia, sche lur entradas annualas suttamessas a la taglia na surpassan betg 42'300 francs.
  • Per las persunas che lavuran en l'agricultura vala ina regulaziun speziala sin basa da la Lescha federala davart ils supplements da famiglia en l'agricultura.

Stagiunarias e stagiunaris u cunfinarias e cunfinaris

Sco cunfinaria u cunfinari d'in pajais da la UE/AECL avais Vus il dretg da supplements da famiglia svizzers per Voss uffants, er sche quels abitan en in pajais da la UE u da la AECL.
Sche Vossa partenaria u Voss partenari lavura en Voss stadi da domicil, nua ch'er Voss uffants abitan, vegnan ils supplements da famiglia pajads en Voss stadi da domicil. In'eventuala differenza tar ils supplements da famiglia en Svizra vegn pajada.
Ulteriuras infurmaziuns davart ils supplements da famiglia per uffants che abitan a l'exteriur chattais Vus en la broschura qua sutvart.

Far valair il dretg da supplements da famiglia

Ils supplements da famiglia na vegnan betg concedids automaticamain, els ston vegnir dumandads. Els pon vegnir pretendids fin 5 onns suenter quai ch'els fissan stads da pajar.

  • Las lavurantas ed ils lavurants ston tschentar a lur patruna u patrun ina dumonda per supplements da famiglia. Quella u quel trametta la dumonda a sia cassa da cumpensaziun per famiglias per l'examinaziun. Sche la cassa da cumpensaziun per famiglias approvescha la dumonda, paja la patruna u il patrun mintga mais ils supplements ensemen cun il salari.
  • Persunas cun activitad da gudogn independenta sa drizzan a lur cassa da cumpensaziun per famiglias per tschentar ina dumonda per supplements da famiglia.
  • Persunas senza activitad da gudogn tschentan lur dumonda a la cassa da cumpensaziun chantunala per famiglias, che vegn manada da las cassas da cumpensaziun chantunalas da la AVS.

Obligaziun d'annunzia

Tut las midadas da las relaziuns persunalas, finanzialas e professiunalas che han consequenzas sin il dretg (incl. scolaziun dals uffants) e sin l'autezza dals supplements, stuais Vus annunziar a Vossa patruna u a Voss patrun u a la cassa da cumpensaziun cumpetenta per famiglias.