Il Cussegl naziunal sa cumpona da 200 parlamentarias e parlamentaris. Quellas e quels represchentan las abitantas ed ils abitants da la Svizra. Pli persunas che vivan en in chantun, pli represchentantas e represchentants che quel ha en il Cussegl naziunal.
Il Cussegl dals chantuns sa cumpona da 46 commembras e commembers che represchentan ils chantuns da la Svizra. Mintga chantun è represchentà cun dus commembras u commembers; ils 6 mezs chantuns han mintgamai mo in sez.
Las 246 commembras e commembers dal Parlament federal vegnan elegids mintga 4 onns dal pievel. Els represchentan las differentas cuminanzas linguisticas, partidas, ideologias e regiuns sco er ils divers interess da la Svizra.
Las parlamentarias ed ils parlamentaris sa radunan regularmain durant las sessiuns, en emprima lingia per deliberar leschas federalas. Ina gronda part da las lavurs dal parlament vegn liquidada ordaifer las sessiuns en il rom da las cumissiuns parlamentaras. Questas cumissiuns han l'incumbensa da predeliberar las fatschentas che las vegnan attribuidas e da preschentar ina proposta a lur chombra.