Il Parlament svizzer ha sia sedia en la Chasa federala a Berna. El consista da duas chombras: dal Cussegl naziunal cun 200 commembras e commembers e dal Cussegl dals chantuns cun 46 commembras e commembers.

Las parlamentarias ed ils parlamentaris vegnan elegids dal pievel per ina perioda d'uffizi da 4 onns. Suenter quest temp d'uffizi pon ellas ed els sa metter a disposiziun per ina reelecziun e vegnir elegids per ulteriuras periodas d'uffizi.

Las duas chombras han las medemas cumpetenzas e decidan davart las medemas fatschentas. Ellas han las suandantas incumbensas principalas:

• Ellas tractan e delibereschan las leschas federalas che valan per l'entir pajais. Perquai vegn il parlament numnà «legislativa».

• Ellas elegian las autoritads federalas impurtantas, per exempel las set commembras e commembers dal Cussegl federal, la presidenta u il president da la Confederaziun, las derschadras federalas ed ils derschaders federals sco er la chanceliera federala u il chancelier federal.

• Ellas fixeschan, quants daners che stattan a disposiziun a la Confederaziun per ademplir sias incumbensas.

• Ellas surveglian la lavur dal Cussegl federal, da l'administraziun federala, dal Tribunal federal e da las interpresas che adempleschan incumbensas federalas, sco la Posta u las Viafiers federalas.

Davart la gronda part da las fatschentas decidan il Cussegl naziunal ed il Cussegl dals chantuns separadamain. Per tscherts conclus, per exempel per las elecziuns, vegnan las duas chombras ensemen e concludan cuminaivlamain en il rom da l'Assamblea federala plenara.

Ils conclus dal parlament èn valaivels mo, sch'il Cussegl naziunal ed il Cussegl dals chantuns èn arrivads al medem resultat. Sche las duas chombras n'arrivan betg al medem resultat, ston ellas manar tras l'uschenumnada procedura d'eliminaziun da las differenzas ed empruvar da chattar in consens.

Las commembras ed ils commembers da las duas chombras sa radunan regularmain a las sessiuns. Las sessiuns han lieu quatter giadas ad onn. Mintga sessiun dura 3 emnas. Ultra da quai pon er avair lieu sessiuns spezialas che duran mo in pèr dis.

Ina gronda part da lur lavurs liquideschan las parlamentarias ed ils parlamentaris tranter las sessiuns en las cumissiuns parlamentaras. Las cumissiuns sa cumponan d'in dumber limità da commembras e commembers da differentas fracziuns politicas. Ellas preparan las propostas che vegnan alura suttamessas durant la sessiun a las duas chombras.

Las debattas da las duas chombras èn publicas. Vus pudais persequitar las debattas en il livestream u en la Chasa federala. Sche Vus vulais persequitar ina debatta al lieu u er mo visitar la Chasa federala, stuais Vus As annunziar ordavant online. Las visitas èn gratuitas.