Il Cussegl federal è la regenza da la Svizra. El maina las fatschentas currentas e realisescha las leschas ch'èn vegnidas concludidas dal parlament. Mintga commembra e mintga commember dal Cussegl federal maina in departament. Ensemen cun la Chanzlia federala furman ils set departaments l'administraziun federala.
Il parlament consista dal Cussegl naziunal (200 commembras e commembers, repartids tenor chantuns tut tenor lur dumber d'abitantas e d'abitants) e dal Cussegl dals chantuns (46 commembras e commembers, mintgamai dus per chantun ed in per ils mezs chantuns). Las duas chombras han ils medems dretgs; ensemen furman ellas l'Assamblea federala plenara. Il parlament decretescha leschas e surveglia la gestiun dal Cussegl federal e dal Tribunal federal. Las commembras ed ils commembers dal parlament vegnan elegids dal pievel e ston render pled e fatg al pievel.
Il Tribunal federal è la dretgira suprema da la Svizra. El procura ch'il dretg vegnia applitgà en moda e maniera unitara e protegia ils dretgs da las burgaisas e dals burgais. Ultra da quai decida el sco instanza superiura davart dispitas giuridicas tranter las burgaisas ed ils burgais ed il stadi ubain tranter la Confederaziun ed ils chantuns.
La separaziun da la legislativa, da l'executiva e da la giudicativa na vala betg mo sin plaun federal, mabain er sin plaun chantunal e communal. Er qua duai vegnir impedida la concentraziun da la pussanza tar singulas persunas u instituziuns e duai vegnir evità l'abus da la pussanza.