Il dumber da commembras e commembers dals singuls parlaments chantunals variescha. En la gronda part dals cas dependa el dal dumber d'abitantas e d'abitants. Actualmain importa il dumber tranter 50 commembras e commembers en il chantun Appenzell Dadens e 180 en il chantun Turitg.
Sco il parlament federal èn tut ils parlaments chantunals parlaments da milissa. Quai vul dir ch'ils commembers pon pratitgar sper lur activitad parlamentara anc in'autra activitad da gudogn.
In parlament chantunal ha en emprima lingia l'incumbensa da decider (acceptar, refusar u midar) davart las leschas chantunalas e da prender posiziun tar iniziativas e petiziuns che vegnan inoltradas da burgaisas e burgais, da vischnancas u d'in u da plirs deputads.
Ultra da quai decida il parlament chantunal davart il preventiv che la regenza chantunala preschenta ed approvescha l'incassament da taxas e taglias.
La finala surveglia il parlament l'activitad da la regenza.
Las deputadas ed ils deputads sa scuntran regularmain – circa ina giada il mais – tenor in chalender fix. Questas sesidas èn – tant sco ils protocols da quellas – per regla publicas.
Ellas ed els sa radunan plinavant en cumissiuns ad hoc (per exempel cumissiun da traffic, cumissiun d'economia), analiseschan dumondas specificas e preparan fatschentas che vegnan alura tractadas en il parlament (plenum) u suttamessas a la regenza
Mintga onn vegn ina commembra u in commember dal parlament elegì sco presidenta u president. La persuna pertutgada ha en spezial l'incumbensa da manar las sesidas dal parlament.