Las autoritads svizras online

directamain tar il cuntegn

Reuniun da la famiglia per burgais da terzs stadis che vivan en Svizra

Vus avais ina permissiun da domicil (permissiun C)

Sche Vus derivais d'in terz stadi ed avais ina permissiun da domicil per la Svizra (permissiun C), dastgan ils suandants confamigliars vegnir a star en Svizra:

  • la consorta u il consort, partenadi registrà
  • uffants fin a 18 onns.

Quai sut la cundiziun che Vus abitais ensemen cun questas persunas.

Entrond en Svizra ston ils confamigliars preschentar ils suandants documents:

  • Voss conjugal sto pudair communitgar en la lingua naziunala che vegn discurrida al lieu da domicil (a bucca almain nivel A1). I basta er da preschentar ina cumprova d’esser annunzià ad ina purschida da promoziun linguistica. Questa cumprova sto vegnir preschentada il pli tard a chaschun da l’annunzia en Svizra.
  • ina carta d'identitad valaivla u in passaport valaivel,
  • eventualmain in visum,
  • in'attestaziun dal stadi d'origin che mussa la relaziun da parentella cun Vus,
  • en cas da confamigliars, per ils quals Vus avais l'obligaziun da mantegniment: ina conferma dal stadi d'origin u dal stadi da derivanza che attesta che Vus procurais per il mantegniment da questas persunas.

Voss conjugal e Voss uffants tranter 12 e 18 onns survegnan ina permissiun da dimora (permissiun B) che ha la medema durada da valaivladad sco Vossa permissiun da domicil. Els dastgan ir a lavurar, ston dentant annunziar quai a las autoritads chantunalas da migraziun. Suenter ina dimora nuninterrutta da 5 onns survegnan els ina permissiun da domicil (permissiun C). Uffants sut 12 onns survegnan immediatamain ina permissiun da domicil (permissiun C).

Vus avais ina permissiun da dimora (permissiun B)

Ina reuniun da la famiglia po vegnir concedida da Vossa autoritad chantunala, sche las cundiziuns da la lescha davart las persunas estras (art. 44) èn ademplidas.
Sa drizzai a l’autoritad da migraziun da Voss chantun.

Per requirents d'asil e fugitivs renconuschids

Durant la procedura d'asil n'han las persunas pertutgadas nagin dretg d'ina reuniun da la famiglia.

Fugitivs renconuschids (permissiun B u C) pon percunter laschar vegnir posteriuramain lur confamigliaras e lur confamigliars en Svizra, sch'i n'existan nagins motivs ch'impedeschan quai.

Fugitivs renconuschids cun in'admissiun provisorica (permissiun F) pon inoltrar ina tala dumonda per lur conjugal e per lur uffants sut 18 onns il pli baud 3 onns suenter la decisiun da l'admissiun provisorica. Lura valan las medemas cundiziuns sco per persunas che han la permissiun B (las persunas abitan ensemen en in’abitaziun gronda avunda ed han avunda meds per sustegnair ils commembers da la famiglia).

Dumandar la reuniun da la famiglia

Annunziar a l'uffizi chantunal da migraziun ch'ins lavuria