Las autoritads svizras online

directamain tar il cuntegn

Reuniun da la famiglia per burgais da la UE/AECL che vivan en Svizra

Vus vivais en Svizra e vulessas er prender en Svizra Vossa famiglia? Tut tenor il pajais d'origin valan differentas disposiziuns.

Sche Vus avais ina permissiun da dimora UE/AECL per la Svizra, pon las suandantas persunas da Vossa famiglia (independentamain da lur naziunalitad) profitar da las disposiziuns davart la reuniun da la famiglia e vegnir a star en Svizra:

  • la consorta u il consort, partenadi registrà
  • uffants e biadis fin a 21 onns u pli vegls, sch'i vegn procurà per lur mantegniment,
  • geniturs, la tatta ed il tat, sch'i vegn procurà per lur mantegniment (la basegnusadad sto esser avant maun effectivamain gia avant lur entrada en Svizra e sto er pudair vegnir cumprovada).
  • Sche Vus essas en scolaziun (scola, studi), dastgan mo la consorta u il consort ed ils uffants, per ils quals Vus avais l'obligaziun da mantegniment, profitar da la reuniun da la famiglia.

Vus stuais ademplir las suandantas cundiziuns, per ch'ina reuniun da la famiglia saja insumma pussaivla:

  • L'abitaziun sto – tenor las usanzas svizras – esser gronda avunda per l'entira famiglia.
  • Persunas cun activitad da gudogn independenta u persunas senza activitad da gudogn: Vus stuais cumprovar che Vus hajas ils meds finanzials necessaris per garantir il mantegniment da Voss confamigliars.

Entrond en Svizra ston ils confamigliars preschentar ils suandants documents:

  • ina carta d'identitad valaivla u in passaport valaivel,
  • eventualmain in visum (tar persunas che n'appartegnan betg ad in stadi a la UE/AECL e ch'èn – tenor las disposiziuns d'entrada – obligadas da dumandar in visum);
  • in'attestaziun dal stadi d'origin che mussa la relaziun da parentella cun Vus,
  • en cas da confamigliars, per ils quals Vus avais l'obligaziun da mantegniment: ina conferma dal stadi d'origin u dal stadi da derivanza che attesta che Vus procurais per il mantegniment da questas persunas.

La permissiun da dimora da Voss confamigliars è valaivla tuttina ditg sco Vossa permissiun da dimora. Il conjugal ed ils uffants da burgais da la UE/AECL dastgan er ir a lavurar en Svizra. Excepziun: Sch'il conjugal e/u ils uffants da burgais da la Croazia han ina permissiun da dimora curta L, è l'entrada en plazza suttamessa a l'obligaziun da dumandar ina permissiun (controlla precedenta da las cundiziuns da salari e da lavur).

Disposiziuns detagliadas dal Secretariat da stadi per migraziun davart la reuniun da la famiglia

Dumandar la reuniun da la famiglia

Annunziar a l'uffizi chantunal da migraziun ch'ins lavuria