Las autoritads svizras online

directamain tar il cuntegn

Renconuschientscha da l'uffant: Proceder

La renconuschientscha è in act giuridic, tras il qual in um renconuscha d'esser il bab d'in uffant.

Sche la mamma è maridada il mument da la naschientscha, vegni supponì automaticamain ch'il conjugal saja il bab da l'uffant, senza che quel al stoppia renconuscher expressivamain. Er sch'in auter um pretenda d'esser il bab natiral da l'uffant, prevala la paternitad dal conjugal (bab giuridic). Tgi che vul midar quests fatgs, sto contestar la paternitad davant dretgira.

Sche la mamma n'è betg maridada il mument da la naschientscha, sto quel um che sa considerescha sco bab natiral, renconuscher expressivamain l'uffant. El po far quai tant avant sco er suenter la naschientscha da l'uffant.

Ina renconuschientscha n'è betg pussaivla, sch'in auter um ha gia renconuschì l'uffant. En in tal cas sto sia renconuschientscha vegnir contestada davant dretgira.

A tgi poss jau ma drizzar?

Sche Vus essas domicilià en Svizra, pudais Vus declerar la renconuschientscha tar mintga uffizi da stadi civil.

Sche Vus vivais a l'exteriur, è la renconuschientscha pussaivla tar l'uffizi da stadi civil al lieu da naschientscha u al lieu da dimora ordinari da Voss uffant, al domicil u al lieu d'origin da sia mamma u – sche Vus essas burgais svizzer – a Voss agen lieu d'origin.

Uffizis da stadi civil en Svizra

Tge documents stoss jau preschentar?

Da princip stuais Vus preschentar mo in document d'identitad ed in attest da domicil. L'Uffizi da stadi civil (vesair survart) vegn As communitgar tge documents supplementars che Vus stuais eventualmain preschentar.

Effects da la renconuschientscha

Sche la renconuschientscha è en vigur, vala la relaziun da figlialanza a partir da la naschientscha da l'uffant. La relaziun da figlialanza è pia retroactiva, sche l'uffant è vegnì renconuschì suenter la naschientscha. Il bab e l'uffant pon far valair lur dretgs ed obligaziuns a partir da quest mument (dretg da tgira, obligaziun da mantegniment, obligaziun da sustegn, dretg d'ierta e.u.v.).

Sch'ils geniturs n'èn betg maridads in cun l'auter, ston els inoltrar ina dumonda correspundenta per survegnir il dretg da tgira cuminaivel. Sch'igl è l'emprim uffant cuminaivel, pon ils geniturs tscherner per l'uffant tranter il num da nubil da la mamma e quel dal bab. Il num tschernì vala lura er per ulteriurs uffants cuminaivels.

Sche la mamma è burgaisa estra ed il renconuschider è svizzer, survegn l'uffant la naziunalitad svizra da ses bab.

Dumondas davart la renconuschientscha, davart la naziunalitad e davart il num da l'uffant pudais Vus drizzar a l'uffizi da stadi civil, nua che Vus avais fatg la renconuschientscha, u a l'autoritad cumpetenta per la protecziun d'uffants e da creschids (APUC).

Co renconusch jau a l'exteriur la renconuschientscha d'in uffant fatga en Svizra?

Sco bab ester d'in uffant che Vus avais renconuschì en Svizra stuais Vus avair sez quità che quest act giuridic vegnia renconuschì en Voss pajais d'origin. Ils uffizis da stadi civil svizzers communitgeschan ina renconuschientscha d'in uffant mo a las autoritads respectivas en Germania, en Austria ed en Italia, e quai sin fundament da cunvegnas cun quests pajais.

As drizzai a la represchentanza da Voss pajais per As infurmar davart las formalitads necessarias.