Las autoritads svizras online

directamain tar il cuntegn

Laschar registrar il partenadi da pèrs da la medema schlattaina

Cun in partenadi registrà pon duas persunas da la medema schlattaina laschar registrar lur partenadi. Ellas s'acquistan uschia dretgs ed obligaziuns. Lur stadi civil sa cloma "en partenadi registrà".

Premissas

Sche Vus vulais laschar registrar Voss partenadi, stuais Vus e Vossa partenaria resp. Voss partenari ademplir las suandantas premissas:

  • Vus stuais esser pli veglia u pli vegl che 18 onns ed avair la medema schlattaina.
  • Ina da las duas persunas sto avair la naziunalitad svizra u viver en Svizra.

Motivs d'impediment

Vus na pudais betg laschar registrar Voss partenadi, sche Vus:

  • essas gia maridada u maridà u vivais en in partenadi registrà,
  • n'essas betg abla u abel da giuditgar ubain
  • essas stretgamain parentada u parentà cun Vossa partenaria u Voss partenari.

La procedura da preparaziun

  • La registraziun dal partenadi stuais Vus annunziar a l'uffizi da stadi civil al domicil d'ina da las duas persunas.
  • Per l'uschenumnada procedura da preparaziun duvrais Vus differents documents, tut tenor la situaziun. Resguardai las infurmaziuns da Voss uffizi da stadi civil u il fegl d'infurmaziun davart il partenadi registrà.
  • Vulais Vus far la registraziun en in auter uffizi da stadi civil? Alura survegnis Vus suenter la procedura da preparaziun in'autorisaziun, cun la quala Vus pudais laschar registrar Voss partenadi en in uffizi da stadi civil da Vossa tscherna entaifer trais mais.

La registraziun

  • La registraziun sco tala po vegnir fatga en mintga uffizi da stadi civil da la Svizra immediatamain u alura entaifer trais mais suenter la procedura da preparaziun.
  • Vus e Vossa partenaria resp. Voss partenari stuais preschentar Voss documents d'identitad ed, en cas che Vus As laschais registrar in auter uffizi da stadi civil, er anc l'autorisaziun respectiva.
  • Cuntrari a la maridaglia na dovri naginas perditgas.
  • Vus survegnis in uschenumnà attest da partenadi.
  • Tar tscherts uffizis da stadi civil dastgais Vus – suenter la fin da la ceremonia uffiziala – barattar ina decleraziun vicendaivla ubain er anels.

Ils custs muntan per regla a 400 fin 500 francs.

Renconuschientscha

Ina lètg tranter persunas da la medema schlattaina ch'è vegnida serrada valaivlamain a l'exteriur vegn renconuschida en Svizra sco partenadi registrà.

Adressas dals uffizis da stadi civil svizzers

Fegl d'infurmaziun davart il partenadi registrà