Las autoritads svizras online

directamain tar il cuntegn

Procedura da divorzi

Tgi che vul sa laschar divorziar, sto sa drizzar a la dretgira e far ina dumonda correspundenta. Il divorzi po vegnir pretendì davant dretgira sin giavisch communabel dals conjugals u sin giavisch singul d’in dals conjugals.

Divorzi sin dumonda cuminaivla

Il pli facil èsi da schliar la lètg, sche tuts dus conjugals vulan quai – l’uschenumnà divorzi sin dumonda cuminaivla:

  • Qua n'èsi betg necessari da preschentar ils motivs per il giavisch da divorziar.
  • Formulai cuminaivlamain ina cunvegna davart las consequenzas dal divorzi (proposta per la dretgira areguard il dretg da tgira, il pajament da mantegniment, l'abitaziun, la separaziun dals bains ed ils custs da dretgira e.u.v.). Er sche la lescha na prescriva betg da consultar in advocat, èsi per regla meglier da far quai.
  • La cunvegna stuais Vus inoltrar tar la dretgira cun ina dumonda en scrit (l'uschenumnada dumonda da divorzi). Tschertas dretgiras mettan a disposiziun formulars prestampads. Vus pudais però er scriver ina simpla charta che Vus As vulessas laschar divorziar – la charta sto vegnir suttascritta da tuts dus conjugals.
  • Tut tenor la situaziun stuais Vus cumplettar la cunvegna e la dumonda cun differents documents. As infurmai tar la dretgira, tge documents che vegnan pretendids.

Document da model "Cunvegna davart las consequenzas dal divorzi"

Divorzi sin dumonda unilaterala

  • Sch'in dals conjugals n'è betg perencletg cun il divorzi, vegn quel pronunzià pir, suenter ch'ils conjugals han vivì separadamain dapi almain 2 onns.
  • En cas excepziunals po ina lètg vegnir separada avant che quests dus onns da separaziun èn passads. La premissa è però quella che la cuntinuaziun da la lètg è daventada insupportabla per in dals conjugals, per exempel pervi da violenza corporala.

Tgenin tribunal è responsabel?

Vus vivais en Svizra

As drizzai per far divorzi a la dretgira civila cumpetenta en il chantun da domicil da la dunna u da l'um. L'organisaziun da las dretgiras variescha da chantun a chantun. Sche Vus n'essas betg segir, As infurmai tar in'autoritad giudiziala chantunala u tar in advocat, tge dretgira che Vus stuais contactar.

Da resguardar: Sche Vus giavischais da sa divorziar be unilateralmain, pudais Vus dumandar il divorzi en Voss lieu da domicil be sche Vus essas dapi in onn en Svizra. Uschiglio duai il divorzi vegnir dumandà en il lieu da domicil da Voss conjugal.

Vus e Voss conjugal essas svizra resp. svizzer e vivais a l’ester

Vus pudais laschar sa divorziar be lura en Svizra, sch’igl è impussibel u insupportabel d’inoltrar la dumonda da divorzi al lieu da domicil ester dal conjugal resp. al lieu da domicil communabel ester.

Autoritads giudizialas chantunalas

Suenter il divorzi infurmescha la dretgira la vischnanca da domicil e la vischnanca burgaisa dal pèr. La vischnanca burgaisa inscriva alura il divorzi en il register da stadi civil.