Las autoritads svizras online

directamain tar il cuntegn

Co funcziunescha la prevenziun per la vegliadetgna en Svizra?

La prevenziun svizra per la vegliadetgna sa basa sin il princip da las trais pitgas. La AVS e l'Assicuranza d'invaliditad (AI) furman en cumbinaziun cun las prestaziuns supplementaras (gidan là, nua che las rentas e las entradas na cuvran betg pli ils custs da la vita minimals) la 1. pitga. Quella duai cuvrir il basegn d'existenza ed è obligatorica. La prevenziun professiunala (cassa da pensiun) ch'è er obligatorica furma la 2. pitga. La 3. pitga è l'atgna prevenziun. Quella è facultativa.

1. pitga / AVS: prevenziun statala

La 1. pitga stat per l'Assicuranza per vegls e survivents (AVS). Latiers tutgan er l'Assicuranza d'invaliditad (AI), la cumpensaziun dal gudogn durant il servetsch militar e maternitad e l'Assicuranza cunter la dischoccupaziun (AD).

Assicuranza per vegls e survivents (AVS)

2. pitga: prevenziun professiunala

Assicurads èn tut ils lavurants ch'èn gia assicurads en la 1. pitga e che gudognan almain 21’150 francs per onn (stadi: 2017). L'assicuranza obligatorica cumenza cun l'entrada en il mund da lavur, il pli baud cun il 17avel onn da vegliadetgna cumplenì. L'emprim – fin al 24avel onn da vegliadetgna – cuvran las contribuziuns mo ils ristgs da la mort e da l'invaliditad. A partir dal mument ch’il 24avel onn è accumplì a la demissiun da l'activitad da gudogn vegni spargnà supplementarmain per la renta da vegliadetgna.

Contribuziuns facultativas

Betg assicurads obligatoricamain n'èn per exempel persunas cun activitad da gudogn independenta e lavurants cun in contract da lavur limità da maximalmain 3 mais. Eventualmain pon questas persunas s'assicurar facultativamain per la prevenziun minimala.

Prevenziun professiunala (cassa da pensiun)

3. pitga: prevenziun privata

La pitga 3a pussibilitescha sin basa facultativa ina prevenziun individuala e favurisada fiscalmain per persunas cun activitad da gudogn.