Per entrar en Svizra tanscha in passaport u ina carta d’identitad naziunala.
La permissiun d’entrar en Svizra senza document da viadi survegnis Vus, sche Vus pudais cumprovar u render vardaivla Vossa naziunalitad.
En tscherts cas renconuscha la Svizra er documents da viadi scadids. La survista da las prescripziuns per documents d’identitad e visums tenor naziunalitad mussa, sche quai è il cas per Vus.
Burgaisas e burgais da pajais d’ordaifer la UE e la AECL che na vegnan betg en Svizra per lavurar, pon star maximalmain trais mais. Ellas ed els ston posseder in passaport ch’è valaivel almain trais mais pli ditg che la data previsa per la partenza da la Svizra e ch’è vegnì emess avant main che diesch onns.
Las burgaisas e burgais da stadis da tscherts pajais d’ordaifer l’Europa dovran ultra da quai in visum per vegnir en Svizra. Sin la pagina d’internet davart ils visums per persunas estras vegnis Vus a savair, sche quai è il cas per Vus.
Cuntrari ad auters pajais na datti en Svizra naginas disposiziuns spezialas davart l’entrada da persunas minorennas che n’appartegnan betg a la famiglia da las cunviagiaturas e dals cunviagiaturs u che viagian sulettas.
I vegn dentant recumandà che talas persunas minorennas viagian cun ina permissiun da viadi suttascritta dals geniturs u da las persunas responsablas per l’educaziun. Ina tala permissiun da viadi duess cuntegnair las indicaziuns persunalas davart ils geniturs e lur numer da telefon. Plinavant èsi d’avantatg, sch’ella cuntegna las suandantas indicaziuns:
ils nums, il numer da la carta d’identitad (ev. copia da la carta) e l’adressa dals geniturs
eventualmain ils nums, il numer da la carta d’identitad e l’adressa da la persuna accumpagnanta
il num ed il numer da la carta d’identitad da la persuna minorenna
la ruta, il motiv e las datas dal viadi permess.
Tschertas vischnancas e tscherts chantuns mettan a disposiziun in formular spezial (qua in exempel dal chantun Vad). La permissiun po dentant er avair la furma d’ina brev.
Sche Vus vulais savair dapli davart ils documents da viadi che permettan en Voss cas d’entrar en Svizra, davart il passagi dal cunfin, davart il viagiar en il spazi da Schengen u davart la concessiun d’in visum, pudais Vus consultar las dumondas las pli frequentas (FAQ) dal Secretariat da stadi per migraziun.