Retratga da la renta da la AVS (1. pitga)
Per survegnir la renta da la AVS stuais Vus annunziar Vossa pretensiun en scrit a la cassa da cumpensaziun, nua che Vus avais pajà las contribuziuns a la AVS durant ils ultims onns. Sche Vus essas emploiada u emploià e n’enconuschais betg Vossa cassa da cumpensaziun, dumandai Vossa patruna u Voss patrun.
Vossa annunzia stuais Vus trametter almain trais mais avant che Vus cuntanschais la vegliadetgna da renta ordinaria, per che la cassa da cumpensaziun possia rimnar tut las infurmaziuns ch’ella dovra per calcular Vossa renta.
Retratga da la renta da la LPP (2. pitga)
Contactai Vossa cassa da pensiun intgins mais avant che Vus cuntanschais Vossa vegliadetgna da renta ordinaria (65 onns per ils umens, 64 onns per las dunnas), per che quella As possia infurmar davart l’autezza exacta da la renta da Vossa 2. pitga e davart ils pass che Vus stuais far per retrair la renta.
Retratga da las contribuziuns da la 3. pitga
Contactai l’instituziun da Voss provediment privat avant che Vus cuntanschais la vegliadetgna da renta ordinaria, per che quella As possia infurmar detagliadamain davart las modalitads per retrair las contribuziuns da Vossa 3. pitga e davart l’autezza dal chapital spargnà.
Retratga anticipada da la renta da la AVS (1. pitga)
En Svizra pudais Vus As laschar pensiunar in u dus onns avant la vegliadetgna da renta ordinaria: Umens pon sa laschar pensiunar gia cun 64 u 63 onns, dunnas cun 63 u 62 onns.
Vus stuais trametter l’annunzia a Vossa cassa da cumpensaziun. Igl è d’avantatg, sche Vus faschais quai trais u quatter mais avant che Vus cuntanschais la vegliadetgna da pensiun. Faschai quai dentant il pli tard l'ultim di dal mais, durant il qual Vus cuntanschais la vegliadetgna che As dat il dretg d'in pensiunament anticipà. Sche Vus inoltrais Vossa annunzia pli tard, pudais Vus pretender la retratga anticipada pir a partir da l'anniversari suandant.
Retratga anticipada da la renta da la LPP (2. pitga)
Il chapital da la 2. pitga na pudais Vus en general betg retrair anticipadamain. Tschertas instituziuns da provediment permettan dentant in pensiunament anticipà a partir da 58 onns.
Contactai Vossa cassa da pensiun almain in onn avant Voss 58. anniversari per sclerir, sch’in pensiunament anticipà è pussaivel e sut tge cundiziuns.
Retratga anticipada da las contribuziuns da la 3. pitga
Il chapital da Vossa 3. pitga pudais Vus en general retrair mo cumplettamain sco pajament unic. Quai pudais Vus far il pli baud tschintg onns avant la vegliadetgna da renta ordinaria (quai vul dir cun 60 onns per umens e cun 59 onns per dunnas).
L’instituziun da Voss provediment privat As po infurmar detagliadamain davart las modalitads per retrair Vossa 3. pitga e davart l’autezza dal chapital spargnà. Contactai l'instituziun intgins mais avant il pensiunament anticipà per instradar la retratga da Voss dabun.
Retratga da la renta AVS (1. pitga), sche Vus lavurais suenter la vegliadetgna da pensiunament
Vus pudais lavurar suenter la vegliadetgna da pensiunament. En quest cas pudais Vus spustar per in fin tschintg onns il mument, a partir dal qual Vus laschais pajar ora la renta da la AVS. Vus pudais dentant er lavurar e medemamain retrair la renta da la AVS.
Contactai almain trais mais avant la vegliadetgna da renta Vossa cassa da cumpensaziun da la AVS. Quella infurmescha, co che Vus stuais proceder en Voss cas.
Retratga da la renta da la LPP (2. pitga), sche Vus lavurais suenter la vegliadetgna da pensiunament
La renta da la 2. pitga vegn normalmain pajada ora a partir da la vegliadetgna da renta ordinaria. Il reglament da Vossa instituziun da provediment po dentant er pussibilitar da spustar il pajament fin al 70. anniversari.
Per eruir, sch’ina suspensiun da Vossa renta è in'opziun per Vus e sut tge cundiziuns ch’ina tala fa senn, As drizzai ad uras a Vossa instituziun da provediment.
Retratga da las contribuziuns da la 3. pitga, sche Vus lavurais suenter la vegliadetgna da pensiunament
Vossa 3. pitga pudais Vus en general retrair mo cumplettamain sco pajament unic. Quai il pli tard la fin dal mais, a partir dal qual Vus survegnis la renta da la AVS.
Sche Vus lavurais dentant suenter la vegliadetgna da pensiunament e pudais cumprovar quai, pudais Vus spustar la retratga da la 3. pitga fin maximalmain tschintg onns suenter che Vus avais cuntanschì la vegliadetgna da renta ordinaria.
L’instituziun da Voss provediment privat As po infurmar detagliadamain davart las modalitads per retrair Vossa 3. pitga e davart l’autezza dal chapital spargnà.
Betg emblidai da far in’assicuranza d’accidents, uschespert che Vus n’avais betg pli ina patruna u in patrun. Fin lura eras Vus numnadamain assicurada u assicurà tar Vossa patruna u Voss patrun cunter accidents.
Sin la pagina d'internet da l’Uffizi federal d’assicuranzas socialas chattais Vus differentas broschuras che tractan detagliadamain il provediment da vegliadetgna. Ellas pon vegnir empustadas gratuitamain u vegnir chargiadas giu sco PDF.
Infurmaziuns davart la renta da vegliadetgna flexibla e davart l’entrada en la vegliadetgna da pensiun chattais Vus sin la pagina Retratga flexibla da la renta da las assicuranzas socialas e sin la pagina Entradas suenter il pensiunament da ch.ch.
Sche Vus vegnis pensiunada u pensiunà, duessas Vus pensar da far in'assicuranza d’accidents. Fin ussa eras Vus numnadamain assicurada u assicurà tar Vossa patruna u Voss patrun cunter accidents.