Las autoritads svizras online

directamain tar il cuntegn

Pajas minimalas resp. pajas medias en Svizra

En Svizra vegnan las pajas negoziadas u individualmain u collectivamain. Las negoziaziuns collectivas vegnan manadas dals partenaris socials (sindicats e federaziuns dals patruns) per in’entira branscha u per tschertas interpresas. Las cundiziuns da lavur e las pajas vegnan alura fixadas consensualmain en il rom d’in contract collectiv da lavur (CCL) che cuntegna tranter auter las disposiziuns concernent il salari, il pajament dal salari, las vacanzas, il temp da lavur ed il congedi.

Per tschertas branschas e gruppas da professiun che n’èn per il solit betg oranisadas en in sindicat e che n’èn betg suttamessas ad in CCL pon las autoritads decretar uschenumnads contracts normals da lavur (CNL).

Calculatur naziunal da pajas

Cun il calculatur naziunal da pajas dal Secretariat da stadi per l’economia (SECO) pudais Vus As infurmar en l'internet davart la paja ch'è usitada en Svizra per Vossa activitad resguardond Voss profil individual (vegliadetgna, experientscha, furmaziun, posiziun en l’interpresa, professiun).

Egualitad da las pajas

Il princip da l'egualitad da las pajas per dunna ed um è francà en la Constituziun federala ed en la Lescha federala davart l'egualitad da dunna ed um. Sche la lavur è identica ed equivalenta, ston tuttas duas schlattainas survegnir la medema paja. L'Uffizi federal per l'egualitad tranter dunna ed um As infurmescha, co che Vus stuais proceder en cas d'ina discriminaziun da paja.