Las autoritads svizras online

directamain tar il cuntegn

Pajar taglias

Persunas privatas ston pajar taglias sin las entradas e sin la facultad. Vitiers vegnan ulteriuras taglias. ch.ch resumescha quai che Vus stuais savair davart las taglias en Svizra.

AVS, scolas, vias, armada: Il stadi sto finanziar sias incumbensas. Per quest intent incassescha el taglias, dazis e taxas.
L'obligaziun independenta da pajar taglia cumenza cun il 18. onn da vegliadetgna.
Mintga onn il schaner u il favrer arriva posta da l'uffizi da taglia: la decleraziun da taglia. Quella po vegnir emplenida oz facilmain al computer.

Cussegls ed ina decleraziun da taglia per exercitar datti er sin  www.steuerneasy.ch.

Quantas taglias che Vus stuais pajar, dependa en emprima lingia da Vossas entradas. Ma er la facultad, il stadi civil, la confessiun, il dumber d'uffants ed il lieu da domicil giogan ina rolla.

En la decleraziun da taglia sa tracti cunzunt da la taglia sin las entradas da la Confederaziun, dals chantuns e da las vischnancas. Questas taglias sco er la taglia sin la plivalur pertutgan praticamain mintgin en Svizra.

Taglia sin las entradas

La taglia sin las entradas sa drizza tenor l'autezza da las entradas. En la gronda part dals cas consista ella dal salari u – en cas da persunas che han plirs patruns – dals salaris. Las indicaziuns latiers chattais Vus sin l'attest da salari che sto vegnir inoltrà ensemen cun la decleraziun da taglia. Er a la Confederaziun ston ins pajar taglia sin las entradas, e quai sur la taglia federala directa. Questa taglia vegn taxada ed incassada dals chantuns.

Ultra da la taglia sin las entradas incasseschan intgins chantuns anc ina taglia persunala u ina taglia per chasada.

Taxaziun da vaglias e d'assicuranzas

Taglia sin la facultad

Tut ils chantuns e tut las vischnancas suttamettan a la taglia er la facultad, sche quella surpassa ina tscherta grondezza. La tariffa da taglia e l'import betg taxà varieschan da chantun a chantun. Bleras persunas na pajan nagina taglia sin la facultad.

Taglia sin la facultad per immobiglias

Cun mintga cumpra pajan ils consuments ina taglia sin la plivalur. Sia autezza variescha. Per products alimentars, per gasettas e per medicaments importa ella 2,5 pertschient, per pernottaziuns en albierts u en hotels 3,7 pertschient. Prest tut las autras cumpras e prestaziuns vegnan engrevgiadas cun 7,7 pertschient TPV. Il kino, il teater, ils concerts e las visitas da museums sco er ils tschains da locaziun èn libers da la TPV.

Ulteriurs geners da taglia

Dasperas datti anc bleras autras taglias. Quellas resultan mo sut tschertas circumstanzas. Tgi che ha in chaun, paja ina taglia da chauns. Plinavant datti ina taglia sin la biera e sin il tubac, la taglia sin vehichels a motor, la taglia sin bigliets, la taglia da baselgia e.u.v.

Entradas da 130 milliardas francs per onn

La Confederaziun, ils chantuns e las vischnancas incasseschan circa 30 differentas taglias. Ensemen incasseschan els uschia circa 130 milliardas francs per onn.

Taglias directas ed indirectas

Il grond dumber da taglias sa lascha divider en duas gruppas:

  • Las taglias directas sco las taglias sin las entradas vegnan incassadas directamain tar ils pajataglias.
  • Las taglias indirectas sco la taglia sin la plivalur resultan p.ex. cun cumprar rauba u servetschs.

Taglias sin interpresas

Er interpresas pajan taglias. Suttamess a la taglia è il gudogn.

Ulteriuras infurmaziuns