Las autoritads svizras online

directamain tar il cuntegn

Naschientscha a l'exteriur

Sche Voss uffant nascha a l'exteriur, n'annunzian las autoritads dal pajais respectiv betg automaticamain la naschientscha da Voss uffant a las autoritads cumpetentas en Svizra. In'excepziun èn la Germania, l'Austria e l'Italia, cun las qualas la Svizra ha fatg ina cunvegna.

Co proceder?

  1. Ils burgais svizzers, las persunas estras che han ina colliaziun famigliara directa cun ina Svizra u in Svizzer e las persunas estras registradas en il register dal stadi civil (Infostar) èn obligads laschar registrar la naschientscha da lur uffant al stadi civil svizzer.
    Las persunas estras che na figureschan betg sin Infostar fan il bain d’annunziar la naschientscha da lur uffant directamain a la controlla d’abitants ed a las autoritads chantunalas da migraziun.
  2. Da princip vala: Per ch'ina naschientscha che ha gì lieu a l'exteriur vegnia registrada en Svizra, ston ils geniturs annunziar la naschientscha tar la represchentanza svizra (ambassada u consulat) da quel pajais, nua che l'uffant è naschì, e surdar a tala l'original da l'attest da naschientscha.
  3. Geniturs che n'èn betg maridads in cun l'auter: Sch'ils geniturs n'èn betg maridads in cun l'auter e sch'il bab ha renconuschì l'uffant, na ston els betg mo preschentar l'attest da naschientscha, mabain er la renconuschientscha da la paternitad.
  4. In genitur è ester: Sche la mamma u il bab è ester, sto la represchentanza svizra survegnir – ultra da l'attest da naschientscha e d'ina eventuala renconuschientscha da la paternitad – ina copia dal passaport ed ils documents necessaris da registraziun en Infostar. Las infurmaziuns survegnis vus da la represchentanza svizra.

  5. La represchentanza svizra a l'exteriur surpiglia ils documents ed examinescha tals avant che trametter en Svizra. Ella infurmescha ils geniturs davart eventuals ulteriurs pass necessaris (legalisaziuns, apostillas e translaziuns).
  6. La represchentanza svizra trametta il document u ils documents a l'autoritad svizra cumpetenta che inscriva las datas en il register da stadi civil svizzer.

Represchentanzas svizras a l'exteriur

Dretg da burgais svizzer en cas d'ina naschientscha a l'exteriur

Tgi che nascha a l'exteriur sco uffant d'in genitur svizzer, perda il dretg da burgais svizzer, sch'el ha cumplenì 22 onns e posseda in'autra naziunalitad. Il dretg da burgais svizzer mantegna dentant, tgi ch'è vegnì annunzià fin a la cumplenida dal 22. onn da vita tar in'autoritad svizra en Svizra u a l'exteriur u ha declerà en scrit ch'el veglia salvar il dretg da burgais svizzer.