Las autoritads svizras online

directamain tar il cuntegn

Lavurar en Svizra per persunas d'in terz stadi

Activitad da gudogn independenta

Sco burgais d’in terz stadi cun domicil en Svizra duvrais vus ina permissiun a partir da l’emprim di da lavur. Ella suttastat a la procedura da permissiun chantunala e federala.

Ina permissiun po vegnir concedida, sch’ella è giustifitgada tras interess economics, sche tschertas premissas persunalas sco er finanzialas e dal manaschi èn avant maun e sche la quota da persunas estras na vegn betg surpassada.

Conjugals da burgaisas e burgais svizzers sco persunas cun ina permissiun da dimora na dovran nagina permissiun supplementara per far ina activitad da gudogn independenta. 

Permissiuns da lavur per burgais da stadis betg da la UE/AECL

Activitad da gudogn dependenta

Il patrun che As vuless engaschar, inoltrescha la dumonda a l'autoritad dal martgà da lavur u a l'autoritad da migraziun da ses chantun. Sche la dumonda vegn acceptada dal chantun vegn ella passada vinavant al Secretariat da stadi per migraziun SEM. La decisiun dal SEM vegn communitgada en furma d'ina disposiziun a las partidas participadas ed a las autoritads chantunalas e na dat betg il dretg d'entrar en Svizra.

En cas da persunas che ston avair in visum transmettan las autoritads chantunalas da migraziun l'autorisaziun d'emetter in visum sin via electronica a la represchentanza svizra a l'exteriur. Vus pudais ir là a prender il visum. Entaifer maximalmain 14 dis suenter Vossa entrada en Svizra As stuais Vus annunziar tar la controlla d'abitants. Pir alura dastgais Vus cumenzar cun Vossa activitad da gudogn.

Per occupar burgais da terzs stadis valan tranter auter las suandantas premissas d’admissiun:

  • L’admissiun resulta en il rom d’interess d’economia globala.
  • In'admissiun è pussaivla mo en il rom dals contingents fixads.
  • Burgais da terzs stadis pon vegnir engaschads mo, sch'i na vegnan chattadas naginas persunas da la Svizra e da stadis da la UE/AECL.
  • Admess vegnan forzas da cader, spezialists sco er autras forzas da lavur qualifitgadas. Sco forzas da lavur qualifitgadas valan en emprima lingia persunas che han in diplom d'ina scola auta u d'ina scola auta professiunala, ina scolaziun professiunala speziala sco er in'experientscha professiunala da plirs onns. Per conceder permissiuns da dimora vegnan er resguardads criteris d'integraziun: l'abilitad da s'adattar en la professiun ed en il champ social, las enconuschientschas linguisticas e la vegliadetgna.
  • Las cundiziuns da salari e da lavur ston correspunder a talas da las forzas da lavur indigenas.