Las autoritads svizras online

directamain tar il cuntegn

Lavurar en Svizra per persunas d'in pajais da la UE/AECL

Per burgaisas e burgais da la UE-27*/AECL** vala la libra circulaziun da persunas cumplaina. Quai vul dir ch'els dastgan entrar en Svizra, viver e lavurar qua.

Activitad da gudogn curta fin a 3 mais (burgaisas e burgais da la UE-27/AECL)

Per in'activitad da gudogn curta (entrada en plazza) fin a 3 mais u 90 dis per onn chalendar na dovran burgaisas e burgaia da la UE-27/AECL nagina permissiun. Il patrun svizzer futur è dentant obligà d'annunziar l'activitad da gudogn sur la procedura d'annunzia electronica. L'annunzia sto vegnir fatga fin il pli tard il di avant il cumenzament da la lavur.

Annunziar online in'activitad da gudogn curta

Activitad da gudogn da passa 3 mais (burgaisas e burgais da la UE-27/AECL)

Per dimoras pli lungas dovran burgaisas e burgais da la UE-27/AECL ina permissiun da dimora. L'annunzia sto vegnir fatga avant il cumenzament da la lavur tar la vischnanca da domicil. Preschentar ston ins:

  • carta d’identitad valaivla u passaport valaivel

En cas d'ina activitad da gudogn dependenta supplementarmain:

  • decleraziun d'engaschament dal patrun u attestaziun da lavur (p.ex. contract da lavur)

En cas d'ina activitad da gudogn independenta supplementarmain:

  • preschentaziun dals cudeschs da fatschenta, per che Vus possias cumprovar che Vus avais effectivamain in'activitad da gudogn independenta e che Vus pudais finanziar Vossa vita. Sche Vus stuais dumandar agid social durant quest temp, perdais Vus Voss dretg da dimora. Ulteriuras infurmaziuns davart la dimora da persunas cun activitad da gudogn independenta survegnis Vus da l'uffizi chantunal da migraziun u sin la pagina d'internet dal Secretariat da stadi per migraziun, www.sem.admin.ch > Einreise & Aufenthalt > Leben und Arbeiten in der Schweiz.

Annunziar tar Vossa vischnanca da domicil

Uffizis da migraziun chantunals

Burgaisas e burgais da la Croazia:

Dapi il 1. da schaner 2017 profitan er burgaisas e burgais da la Croazia da la libra circulaziun da persunas. Per els valan dentant anc disposiziuns transitoricas.

Ad interim pon els vegnir autorisads da cumenzar in'activitad da gudogn mo, sche las suandantas restricziuns vegnan resguardadas:

  • controlla da la precedenza da persunas indigenas (favurisaziun da persunas indigenas ed estras che sa chattan gia sin il martgà da lavur svizzer)
  • controlla da las cundiziuns da salari e da lavur
  • il dumber maximal separà da permissiuns da dimora curta e da permissiuns da dimora che crescha onn per onn.

Cundiziuns per il cumenzament d’ina activitad da gudogn independenta:
Areguard il cumenzament d’ina activitad da gudogn independenta valan dapi il 1. da schaner 2019 las medemas cundiziuns sco per burgaisas e burgais dals stadis commembers da la UE-27/AECL. Burgaisas e burgais da la Croazia ston cumprovar l’activitad da gudogn independenta a chaschun da l’inoltraziun da la dumonda e n’èn betg pli suttamess al temp d’installaziun ed al dumber maximal.

Factsheets Croazia

Tschertga d'ina plazza da lavur en Svizra

Burgais da la UE/AECL pon entrar en Svizra per tschertgar ina nova plazza da lavur. Per ina dimora da fin a 3 mais na dovran els nagina permissiun. Sche la tschertga d'ina nova plazza dura pli ditg, survegnan burgais da la UE/AECL supplementarmain ina permissiun da dimora curta UE/AECL ch'è valaivla 3 mais durant l'onn chalendar (dimora totala = 6 mais), sch'els disponan dals meds finanzials ch'èn necessaris per finanziar lur custs da viver.

*La UE-27 cumpiglia ils suandants stadis: Austria, Belgia, Bulgaria, Cipra, Danemarc, Estonia, Finlanda, Frantscha, Germania, Grezia, Irlanda, Italia, Lettonia, Lituania, Luxemburg, Malta, Pajais Bass, Pologna, Portugal, Reginavel Unì, Rumenia, Slovachia, Slovenia, Spagna, Svezia, Tschechia, Ungaria.

**AECL: Islanda, Liechtenstein, Norvegia, Svizra