Quantas emnas?
Vus avais il dretg d’almain quatter emnas vacanzas per onn, independentamain da Voss pensum da lavur.
Fin la vegliadetgna da 20 onns avais Vus almain tschintg emnas vacanzas.
Tut tenor patruna u patrun (u contract collectiv da lavur) survegnis Vus eventualmain er dapli vacanzas.
Co fixesch jau mias vacanzas?
Tar la dumonda, cura che Vus retirais Vossas vacanzas, sto Vossa patruna u Voss patrun dar ses consentiment. Sche Vossas vacanzas n’èn betg cumpatiblas cun l’organisaziun dal manaschi u cun ils interess ed ils basegns da quel, po Vossa superiura u Voss superiur pretender che Vus spostias Vossas vacanzas.
Vacanzas e malsogna
Vacanzas servan a la recreaziun. Sche Vus na pudais betg As recrear durant las vacanzas pervia d’ina malsogna u pervia d’in grev accident, avais Vus il dretg da spustar las vacanzas; per quai stuais Vus preschentar in attest dal medi.
Vacanzas e disditga
Da princip pudais Vus retrair las vacanzas che Vus avais anc dabun er durant il termin da disditga . Vossa patruna u Voss patrun po dentant refusar quai, sch’i sa tracta d’ina situaziun da manaschi excepziunala.
En tscherts cas pudais Vus As cunvegnir cun Vossa patruna u Voss patrun da vegnir indemnisada u indemnisà per ils dis da vacanzas restants.
Il 1. d’avust (di da la festa naziunala) e l’unic firà federal. Ils chantuns pon definir per lur territori maximalmain otg ulteriurs firads eguals a dumengias. Ils firads chantunals varieschan damai da chantun a chantun.
Sch’in firà croda sin in di da lavur liber (p.ex. sonda u dumengia), na datti nagin dretg da cumpensar el durant l’emna. Sch’in firà è durant Vossas vacanzas, na quinta el betg sco di da vacanzas.
En tscherts cas pudais Vus esser absenta u absent da la lavur senza stuair cumpensar pli tard las uras u ils dis. Quai vala per exempel en ils suandants cas:
adempliment d’obligaziuns giuridicas
execuziun d’in uffizi public (commembra u commember d’in parlament communal u d’ina executiva communala e.u.v.)
nozzas
naschientscha d’agens uffants
mort d’ina proxima parenta u d’in proxim parent
midada da chasa
tgira d’ina proxima parenta u d’in proxim parent
Quantas uras libras e dis libers che As stattan a disposiziun en quests cas n’è betg reglà cleramain en la lescha. As infurmai tar Vossa patruna u Voss patrun davart las reglas che valan en Vossa interpresa.
Resguardai per plaschair: sche Vus vegnis memia tard a la lavur u sche Vus essas dal tuttafatg absenta u absent pervia da circumstanzas externas – per exempel pervia da traffic, pervia da vias serradas u pervia da l’annullaziun d’in sgol u d’ina colliaziun da tren – n’è Vossa patruna u Voss patrun betg obligada u obligà d’As regalar questas uras e Vus stuais cumpensar il temp da lavur che manca.
Sin la pagina d’internet dal Secretariat da stadi per l’economia (SECO) chattais Vus respostas a las dumondas las pli frequentas davart firads e vacanzas.
Ils firads dals singuls chantuns chattais Vus en il document «Survista dals firads chantunals tenor lescha» sin la pagina Dretg da procedura civila da l’Uffizi federal per giustia.
Sin la pagina d’internet dal Secretariat da stadi per l’economia (SECO) chattais Vus ultra da quai respostas a las dumondas las pli frequentas davart absenzas da lavur.
Infurmaziuns davart malsogna, accident, gravidanza e maternitad chattais Vus sin las paginas «Invaliditad» , «Gravidanza, maternitad e lavur» , «Congedi da paternitad», e «Congedi da maternitad».
Infurmaziuns davart absenzas da lavur pervia da malsogna da l’agen uffant chattais Vus sin la pagina «Sustegn cumplementar a la famiglia» .
Ulteriuras infurmaziuns davart vacanzas durant il termin da disditga chattais Vus sin la pagina «Disditga».