Las autoritads svizras online

directamain tar il cuntegn

Lavur reducida

Per mantegnair plazzas da lavur pon firmas reducir temporarmain u interrumper cumplettamain il temp da lavur dals collavuraturs. Sche passa 10 % da la lavur croda ora, discurran ins da lavur reducida.

Per mantegnair plazzas da lavur pon firmas reducir temporarmain u interrumper cumplettamain il temp da lavur dals collavuraturs.

Annunziar la lavur reducida

Il patrun sto annunziar al chantun en scrit la lavur reducida planisada almain 10 dis avant che quella cumenzia. Sco persuna emploiada na stuais Vus sez far nagut. Il chantun examinescha, sche la lavur reducida è legitima e sch'ella serva effectivamain a mantegnair las plazzas da lavur.

Consentiment dals collavuraturs

Per introducir la lavur reducida dovra il patrun il consentiment en scrit da las persunas emploiadas. Vus avais il dretg da refusar la lavur reducida. Il patrun sto lura pajar vinavant il salari cumplain tenor il contract da lavur.

Indemnisaziun per lavur reducida

  • Per la lavur che croda ora survegnis Vus ina indemnisaziun per lavur reducida. Quella importa 80 % da la perdita da gudogn, vul dir 80 % da la paja persa.
  • Emprendists e persunas emploiadas temporarmain n'èn betg pertutgads da la lavur reducida. Els survegnan la paja cumplaina. E cunquai che lur contract da lavur è limità, na po lur plazza per regla er betg vegnir desditga.

Calculaziun da la paja en cas da lavur reducida

Exempel:
Inschigner, in uffant che sto vegnir sustegnì
Paja assicurada: 7'810 francs
(Sco paja assicurada vala – ditg simpel – la paja, da la quala las contribuziuns da la AVS èn gia vegnidas deducidas. Il 13avel salari mensil vegn er quintà, betg dentant spesas da professiun.)

Situaziun da partenza Calculaziun da la paja Paja Explicaziuns
A. Lavur reducida 50 % 50 % paja dal patrun 3'905.-  
  80 % da 50 % (indemnisaziun per lavur reducida) 3'124.-

plus supplement per uffants / per scolaziun, sco senza lavur reducida

    Total 7'029.-  

 

Cumparegliaziun cun la dischoccupaziun

B.Dischoccupaziun

80% da 7'810                             Total 6'248.-      plus supplement per uffants / per scolaziun per di tenor la regulaziun chantunala, tant enavant che nagin auter na po far valair il dretg

La lavur reducida n'ha nagina influenza sin la durada che Vus pudais retrair ina indemnisaziun da dischoccupaziun. Suenter la lavur reducida vegnan ils daners da dischoccupaziun calculads sin basa da la paja normala.

Contribuziuns a la AVS, AI, CG ed AD

La lavur reducida n'ha medemamain nagina influenza sin Vossas contribuziuns per las assicuranzas socialas (assicuranza per vegls e survivents AVS, assicuranza d'invaliditad AI, urden da cumpensaziun dal gudogn CG, assicuranza cunter la dischoccupaziun AD). Ils patruns e las persunas emploiadas ston pajar las contribuziuns cumplainas er vinavant.

Pussaivladad da desdir la plazza

Patruns, ma er persunas emploiadas dastgan desdir da tut temp la plazza durant ina fasa da lavur reducida, sch'els observan ils termins da desditga. Durant il temp da desditga sto il patrun pajar il salari cumplain a la persuna emploiada, e quai independentamain dal fatg, sch'ina occupaziun cumplaina è pussaivla u betg.

Adressas da las cassas da dischoccupaziun (en tudestg)