Las autoritads svizras online

directamain tar il cuntegn

Lavur da dumengia e lavur da notg

La lavur da notg (da las 23.00 fin las 06.00) e la lavur da dumengia (da sonda a las 23.00 fin dumengia a las 23.00) èn da princip scumandadas.

La lavur da notg e la lavur da dumengia pon vegnir permessas, sche tschertas cundiziuns èn ademplidas. Per tschertas categorias da lavurantas e lavurants e da manaschis èn applitgablas disposiziuns spezialas che permettan la lavur da notg e la lavur da dumengia senza ina permissiun precedenta (guardar Ordinaziun 2 tar la Lescha da lavur).

Senza ses consentiment explicit na dastga la lavuranta u il lavurant en general betg vegnir clamà a la lavur la dumengia u la notg.

Lavur da dumengia e lavur da notg temporara

Per il manaschi

Ins discurra da lavur da notg temporara, sch'ella na dura betg pli ditg che 3 mais per manaschi ed onn chalendar u sch'ella ha in caracter unic e na dura betg pli ditg che 6 mais.

Lavur da dumengia temporara exista, sch'ella na cumpiglia betg dapli che 6 dumengias per manaschi ed onn chalendar, inclusivamain firads uffizials, u sch'ella dura maximalmain 3 mais, premess ch'ella haja in caracter unic.

Lavur da notg e lavur da dumengia temporara che sa chattan ordaifer ils cas enumerads en l'Ordinaziun 2 tar la Lescha da lavur ston vegnir permessas dal chantun. Ellas vegnan permessas, sch'in basegn urgent è avant maun.

Per la lavuranta u il lavurant

La lavuranta u il lavurant presta lavur da notg temporara, sch'el lavura durant maximalmain 24 notgs per onn. En quest cas al sto la patruna u il patrun pajar in supplement da paja d'almain 25 %.

Lavur da dumengia temporara è avant maun, sche la lavuranta u il lavurant sto lavurar a maximalmain 6 dumengias per onn. En quest cas survegn la lavuranta u il lavurant tant in supplement da paja da 50 % sco er ina cumpensaziun dal temp. Lavur da dumengia che dura fin 5 uras sto vegnir cumpensà cun temp liber da la medema durada. Sch'ella dura pli ditg che 5 uras, sto vegnir concedì in di da paus supplementar d'almain 24 uras successivas (tut en tut pia 35 uras) suenter il temp da paus quotidian.

Lavur da dumengia e lavur da notg permanenta u regulara

Per il manaschi

Ins discurra da lavur da notg permanenta u regulara, sche las limitas da la lavur da notg u da la lavur da dumengia temporara vegnan surpassadas.

Ordaifer ils cas enumerads en l'Ordinaziun 2 tar la Lescha da lavur permetta il SECO lavur da notg u lavur da dumengia permanenta u regulara, sch'i èn avant maun indispensabladads tecnicas u economicas.

Per la lavuranta u il lavurant

A partir da 25 notgs per onn chalendar discurran ins da lavur da notg permanenta respectivamain regulara.

En quest cas ha la lavuranta u il lavurant il dretg d'ina controlla medicala sco er d'ina cussegliaziun. En tschertas situaziuns è la controlla medicala obligatorica.

En cas da lavur da notg u lavur da dumengia permanenta u regulara croda davent il dretg d'in supplement da paja e la lavuranta u il lavurant ha – per motivs da la protecziun da la sanadad – il dretg da cumpensar il temp da lavur. Lavur da notg permanenta u regulara generescha il dretg d'in supplement da temp da 10 pertschient da la lavur che vegn prestada la notg. Quest temp da paus da gulivaziun sto vegnir concedì en il decurs d'in onn. Il temp da paus da cumpensaziun en cas da lavur da dumengia permanenta u regulara è il medem sco tar la lavur da dumengia temporara.

Ulteriuras infurmaziuns

Ulteriuras infurmaziuns davart la lavur da notg e da dumengia chattais Vus en il fegl d'infurmaziun dal SECO pertutgant las disposiziuns las pli impurtantas concernent la lavur e concernent il temp da paus.

Fegl d'infurmaziun "Las disposiziuns las pli impurtantas davart il temp da lavur e da paus" (en tudestg)