Las autoritads svizras online

directamain tar il cuntegn

Incapacitad da lavurar pervi da malsogna u gravidanza – dretgs ed obligaziuns

Tge prescripziuns datti per persunas emploiadas?

Infurmar il patrun

Sche Vus essas malsaun u na pudais betg lavurar, perquai che Vus essas en speranza, infurmai Voss patrun. Per il solit stuais Vus preschentar in attest dal medi a partir dal terz di da lavur, mintgatant er gia a partir da l'emprim di (tut tenor las disposiziuns da Voss contract da lavur). En cas d'ina incapacitad da lavurar parziala sto l'attest dal medi inditgar quantas uras che Vus dastgais lavurar.

Sche Vus vegnis malsauns durant Vossas vacanzas, essas Vus obligats dad infurmar a Voss patrun da lavur. Per quels dis che Vus eras malsauns ed avais in attestat dal medi, na stuais Vus betg retrair dis da vacanzas.  

Cuntinuaziun da la paja en cas da malsogna

En cas da malsogna èn ils patruns obligads da pajar vinavant durant in tschert temp 100 % da la paja a lur collavuraturs. Tenor il Dretg d'obligaziuns DO importa la durada minimala 3 emnas en il 1. onn da servetsch. Suenter sto la paja vegnir pajada durant in temp adequat pli lung, tut tenor la durada da la relaziun da lavur e tut tenor las circumstanzas spezialas. Tenor la pratica da las dretgiras sa drizzan ins tenor la scala bernaisa, basilaisa e turitgaisa. Autras cunvegnas èn pussaivlas, ston dentant vegnir fixadas
per ils lavurants en moda equivalenta ed en scrit (p.ex. en il contract da lavur) u en in contract normal u collectiv da lavur.

Assicuranza da diaria per malsauns

Blers patruns fan in'assicuranza da diaria per malsauns per pudair pajar a lur collavuraturs er en cas d'absenzas pli lungas 80 % da la paja. Almain la mesadad da las premias ston vegnir pajadas dal patrun. En cas d'incapacitad da lavurar vegn Vossa paja pajada vinavant, fin che Vus essas puspè abel da lavurar, maximalmain dentant 720 dis entaifer 900 dis consecutivs.

Consultai Voss reglament da lavur per eruir tge regulaziuns che valan en Vossa interpresa.

Cuntinuaziun da la paja tenor la scala bernaisa, basilaisa e turitgaisa

Desditga durant ina incapacitad da lavurar

Sche Vus vegnis malsauns durant il temp d'emprova, n'avais Vus nagina protecziun cunter la desditga.

Sche Vus essas scrit malsaun pervi da malsogna u gravidanza, na po Voss patrun betg desdir Vossa plazza durant quest temp.

Per persunas cun activitad da gudogn independenta

Sco persuna cun activitad da gudogn independenta stuais Vus far in'assicuranza da diarias per avair il dretg d'ina cuntinuaziun da la paja en cas da malsogna. En cas d'incapacitad da lavurar vegn Vossa paja pajada vinavant, fin che Vus essas puspè abel da lavurar, maximalmain dentant 730 dis.

En l'internet chattais Vus servetschs da cumparegliaziun per offerents d'assicuranzas da diarias.

Renta d'invaliditad

Sche Voss dretg d'ina cuntinuaziun da la paja va a fin e sche Vus essas anc adina incapabel da lavurar, pudais Vus dumandar ina renta d'invaliditad.