Las autoritads svizras online

directamain tar il cuntegn

Glista da controlla "Mortori fin a la sepultura" (part 1)

Sch'ina persuna che stat datiers mora, ston vegnir liquidadas bleras chaussas administrativas. Nossa glista da controlla "Mortori fin a la sepultura" As gida a pensar a tut. La glista da controlla "Mortori – suenter la sepultura" cuntegna tut quai che sto anc vegnir liquidà suenter la sepultura.

As procurar in'attestaziun da mort

Clamai il medi da famiglia u il medi d'urgenza (nr. 144). Quel vegn ad emetter in'attestaziun da mort. Sche la persuna mora en ina instituziun sco in ospital, ina chasa u ina praschun, vegn quella instituziun ad emetter l'attestaziun da mort. Cun l'attestaziun u cun l'annunzia da mort po la persuna defuncta vegnir transferida al lieu da bara.

Sche la mort è vegnida chaschunada d'in accident u d'in delict, sto vegnir clamada la polizia che sclerescha exactamain ils fatgs.

Posts da polizia

Annunziar in mortori

Dependentamain dal lieu da domicil da la persuna defuncta ston ils proxims confamigliars annunziar il mortori entaifer 2 dis tar las suandantas autoritads:

  • uffizi da stadi civil dal lieu da la mort u
  • uffizi da sepultura al lieu da domicil da la persuna defuncta.

Preschentai ils suandants documents (sche avant maun):

  • attestaziun u annunzia da mort dal medi
  • quittanza dals documents deponids / cudeschet da famiglia
  • document persunal / passaport / carta d'identitad
  • permissiun da domicil / permissiun da dimora (tar persunas estras).

L'uffizi da stadi civil vegn alura ad emetter il document d'attestaziun da mort. 

La mort da persunas estras senza domicil en Svizra sto medemamain vegnir annunziada a l'uffizi da stadi civil. L'uffizi da stadi civil infurmescha davart ils documents necessaris.

Adressas dals uffizis da stadi civil svizzers

Uffizi da sepultura da la vischnanca

Mort a l'exteriur

Sch'in burgais svizzer mora a l'exteriur, infurmescha l'autoritad estra la represchentanza svizra al lieu. Sche quai na vegn betg fatg, pudais er Vus, sco confamigliar, surdar l'attestaziun estra da mort a la represchentanza svizra. Quella vegn a transferir il document a la vischnanca burgaisa.

Sch'ina persuna giavischa da vegnir sepulida en Svizra, s'occupa medemamain la represchentanza svizra dals documents necessaris per il repatriament.

Represchentanzas svizras a l'exteriur

Infurmar

Infurmai ils confamigliars, ils vischins, ils amis sco er il patrun. 

Organisar la sepultura

La sepultura po vegnir fatga il pli baud 48 uras suenter la mort e pir suenter l'annunzia a l'uffizi cumpetent. Ils usits e las formalitads da la sepultura èn reglads differentamain en Svizra. Discutai cun l'uffiziant cumpetent da l'uffizi da stadi civil u da l'uffizi da sepultura ils detagls da la sepultura:

  • ultim giavisch da la persuna defuncta
  • transferiment da la persuna defuncta dal lieu da la mort al lieu da bara
  • gener da sepultura
  • lieu, data ed uras sco er rom dal funeral e dal pled funeber
  • vaschè giavischà u urna giavischada

Custs: As infurmai tar l'uffizi da stadi civil u tar l'uffizi da sepultura tge prestaziuns ch'èn gratuitas. Bleras vischnancas porschan per lur defuncts ina sepultura u cremaziun gratuita.

Eventualmain pudais Vus er delegar l'organisaziun da la sepultura ad ina interpresa da sepultura. As infurmai ordavant davart ils custs.

Sepulturs en Vossa vischinanza