Las autoritads svizras online

directamain tar il cuntegn

Glista da controlla per midar chasa

Avais Vus pensà a tut per far midada? Ad avisar la partenza ed ad annunziar l'arriv tar la vischnanca? A la midada d'adressa tar la Posta? Nossa glista da controlla per midar chasa As gida da betg emblidar insatge – avant, durant e suenter ils dis stressants da midar chasa.

Avant che midar chasa

  • Faschai in nov contract da locaziun (u in contract da cumpra) e desdi il vegl entaifer il termin, il meglier cun ina brev recumandada.
  • Dumandai in di liber tar Voss patrun. Per regla avais Vus il dretg d'in di per midar chasa. En cas da distanzas lungas survegnis Vus eventualmain er liber pli ditg.
  • Annunziai a temp Vossa partenza tar Vossa veglia vischnanca da domicil – As infurmai ordavant tar la controlla d'abitants, sche Vus stuais eventualmain As preschentar persunalmain.
  • Sche Vus possedais in chaun, stuais Vus annunziar er la partenza da quel tar Vossa vischnanca da domicil veglia.
  • Infurmai il schef da secziun (militar), il post da servetsch civil (servetsch civil) ubain il post da protecziun civila (protecziun civila) da Vossa veglia vischnanca da domicil.
  • Infurmai l'uffizi per il traffic sin via. (Sche Vus midais chantun, infurmai l'uffizi per il traffic sin via da Voss nov chantun da domicil.)
  • Contactai las persunas d'instrucziun e las autoritads da scola, sche Vus avais uffants che van a scola.
  • Infurmai Voss vegl uffizi postal che Vus midais chasa (incumbensa da respediziun).
  • N'emblidai betg d'infurmar Voss furnitur d'electricitad, da gas e dad aua per ch'il quintader vegnia controllà.
  • Infurmai Vossa societad da telefon che Vus midais chasa (annunziar resp. desdir las colliaziuns da telefon, d'internet e da televisiun).
  • Infurmai la SERAFE AG che Vus midais chasa (concessiun da radio e da televisiun).
  • Communitgai Vossa nova adressa a la banca, al patrun, a la cassa da cumpensaziun (persunas pensiunadas e persunas cun activitad da gudogn independenta), al medi, al dentist, a la cassa da malsauns, a las assicuranzas, a la(s) chasa(s) editura(s) da Vossa(s) gasetta(s), al secretariat da l'uniun e.u.v.
  • As infurmai tar l'administraziun d'immobiglias, tar la polizia resp. tar la vischnanca davart las permissiuns ch'èn eventualmain necessarias (p.ex. terren public), sche plazzas da parcar u plazzas publicas ston vegnir occupadas per pli ditg pervia da la midada.

Incumbensar la posta da spedir suenter la posta en cas d'ina midada d'abitaziun

Il di da midada

  • Far in protocol da restituziun cun il locatur (resp. cun il proprietari) da la veglia abitaziun.
  • Restituir tut las clavs cunter ina quittanza.
  • Far in protocol da surpigliada cun il locatur (resp. cun il proprietari) da la nova abitaziun.

Suenter avair midà chasa

  • As annunziai entaifer il termin (per regla 14 dis) tar la controlla d'abitants da Vossa nova vischnanca da domicil. (Ella trametta las infurmaziuns a l'autoritad da taglia cumpetenta.)
  • Sche Vus possedais in chaun, stuais Vus annunziar er quel tar la controlla d'abitants da Vossa nova vischnanca da domicil
  • Infurmai il schef da secziun (militar), il post da servetsch civil cumpetent (servetsch civil) ubain il post da protecziun civila (protecziun civila) da Vossa nova vischnanca da domicil.