Curtamain
Tut las persunas en Svizra survegnan ils tractaments medicinals ch'ellas dovran. Ils custs respectivs vegnan surpigliads da l'assicuranza obligatorica da malsauns. Ils custs èn creschids fermamain ils ultims decennis ed uschia er las premias da las cassas da malsauns. Las premias engrevgeschan pli e pli ina part da la populaziun. Var in quart da la populaziun survegn ina reducziun da la premia che vegn finanziada tras la Confederaziun ed ils chantuns. La Confederaziun augmenta automaticamain sia contribuziun, sch'ils custs s'augmentan. Ils chantuns fan quai mo per part.
L'iniziativa pretenda che las persunas assicuradas stoppian surpigliar maximalmain 10 pertschient da lur entradas disponiblas per las premias. La Confederaziun ed ils chantuns duain augmentar la reducziun da la premia. La Confederaziun duai surpigliar almain dus terzs da la reducziun. Quai chaschunass custs supplementars da pliras milliardas francs per onn.
Il Cussegl federal ed il parlament refusan l'iniziativa. Els han dentant elavurà ina cuntraproposta indirecta. Ozendi reducescha la Confederaziun las premias automaticamain pli fitg, sch'ils custs da l'assicuranza obligatorica da malsauns s'augmentan. Ils chantuns duain er far quai. La cuntraproposta indirecta als oblighescha da pajar ina contribuziun minimala a la reducziun da las premias. Per ils chantuns resultassan custs supplementars d'almain 360 milliuns francs, per la Confederaziun dentant nagins custs. La cuntraproposta entra en vigur, sche l'iniziativa vegn refusada e sch'i na vegn betg fatg in referendum cunter la cuntraproposta.
Recumandaziun dal Cussegl federal e dal parlament: na
Per il Cussegl federal ed il parlament è l'iniziativa cun custs supplementars annuals da milliardas memia chara ed ad ella manca in impuls per franar ils custs da sanadad. Per quest motiv han els elavurà ina cuntraproposta indirecta che reducescha las premias er pli fitg e che dat supplementarmain in impuls per franar ils custs.
Recumandaziun dal comité d'iniziativa: gea
Cun l'Iniziativa da distgargia da las premias vegnan las premias plafonadas. Ellas na dastgan betg importar dapli che 10 pertschient da las entradas disponiblas. Tenor il comité na protegia quai betg mo persunas cun pajas bassas, mabain er famiglias, pèrs pensiunads e persunas cun entradas medias.
Curtamain
Tut las persunas en Svizra profiteschan d'in bun provediment medicinal e survegnan ils tractaments necessaris. Ils custs respectivs vegnan surpigliads da l'assicuranza obligatorica da malsauns. Dapi sia introducziun l'onn 1996 èn quests custs ed uschia er las premias da las cassas da malsauns creschids fermamain. Quai tranter auter, perquai che la populaziun vegn pli e pli veglia, perquai ch'i dat novas terapias e novs medicaments e perquai che talas e tals vegnan duvrads pli savens. In motiv èn dentant er fauss impuls e structuras ineffizientas.
L'iniziativa vul introducir in frain dals custs. En il futur duain il svilup dals salaris e la creschientscha economica prescriver, quant fitg ch'ils custs da l'assicuranza obligatorica da malsauns dastgan crescher maximalmain. Ensemen cun ils chantuns, cun ils assicuraders da malsauns e cun ils furniturs da prestaziuns sto la Confederaziun prender mesiras, per che l'augment dals custs restia en il rom admissibel. Co che las pajas ed il svilup economic vegnissan mesirads concretamain e tge mesiras che vegnissan prendidas, na prescriva l'iniziativa betg. Quai stuess il parlament fixar en la lescha.
Il Cussegl federal ed il parlament refusan l'iniziativa. Els han elavurà ina cuntraproposta indirecta. En enclegientscha cun ils acturs dal sectur da sanadad duai il Cussegl federal fixar mintga 4 onns, quant fitg ch'ils custs da l'assicuranza obligatorica da malsauns dastgan crescher maximalmain. Sch'ils custs creschissan pli fitg, stuessan il Cussegl federal ed ils chantuns examinar mesiras per curreger quai. La cuntraproposta entra en vigur, sche l'iniziativa vegn refusada e sch'i na vegn betg fatg in referendum cunter la cuntraproposta.
Recumandaziun dal Cussegl federal e dal parlament: na
Per il Cussegl federal ed il parlament è il frain dals custs memia pauc flexibel. Motivs giustifitgads per custs da sanadad pli auts na vegnan betg resguardads, per exempel la veglia detgna creschenta da la populaziun u progress medicinals. La cuntraproposta indirecta dal Cussegl federal e dal parlament resguarda quests motivs.
Recumandaziun dal comité d'iniziativa: gea
Per il comité po l'augment da las premias vegnir limità duraivlamain mo cun agid d'in frain dals custs en il sectur da sanadad. La culpa che las premias da las cassas da malsauns creschan dapi onns, saja numnadamain l'augment illimità dals custs da sanadad.
Curtamain
La primavaira 2020 è la pandemia da corona arrivada en Svizra. Il Cussegl federal ha prendì mesiras per part rigurusas per proteger la populaziun cunter il virus e per evitar ch'il sectur da sanadad, cunzunt ils ospitals, vegnia surchargià. A medem temp han perscrutadras e perscrutaders sin tut il mund cumenzà a sviluppar vaccins cunter il nov virus. Bleras parts da la populaziun han gì grondas speranzas en quests vaccins ed en la vaccinaziun sco via or da la pandemia. Auters han gì ina tenuta negativa envers la vaccinaziun. En quest ambient politic e social è questa iniziativa vegnida lantschada l'atun 2020.
L'iniziativa pretenda che la persuna pertutgada dettia ses consentiment ad intervenziuns en l'integritad corporala u spiertala. Gia oz è l'integritad corporala e spiertala francada en la constituziun. Quest dretg fundamental protegia il corp cunter l'influenza dal stadi. Tenor l'iniziativa na dastga ina persuna, che refusa da dar ses consentiment, ni vegnir chastiada ni vegnir dischavantagiada. Il text da l'iniziativa na discurra betg da «vaccinaziuns», mabain en general dad «intervenziuns en l'integritad corporala e spiertala». El cumpiglia pia da princip tut las acziuns da la Confederaziun, dals chantuns e da las vischnancas, che han ina influenza sin il corp, per exempel la lavur da la polizia e l'execuziun da chastis. Tge consequenzas concretas che quai avess, sche l'iniziativa vegniss acceptada, dependess da la realisaziun e da la giurisdicziun.
Recumandaziun dal Cussegl federal e dal parlament: na
Il Cussegl federal ed il parlament refusan l'iniziativa, perquai che sia finamira centrala, l'integritad corporala, è gia francada sco dretg fundamental en la constituziun. Gia oz na dastga nagin vegnir vaccinà senza ses consentiment. Plinavant n'èsi betg cler, tge consequenzas che l'iniziativa avess per la lavur da la polizia e da la giustia.
Recumandaziun dal comité d'iniziativa: gea
Per il comité d'iniziativa vai per pudair decider vinavant libramain davart l'agen corp. Il corp saja l'ultima bastiun da la libertad. L'uman saja mo liber, sch'el possia decider, tge ch'entra en ses corp. En questa dumonda na possian ins betg sa fidar da la politica.
Curtamain
Igl è daventà pli difficil da proveder la Svizra da tut temp cun avunda energia. La restructuraziun dal provediment d'electricitad en l'Europa ed ils conflicts internaziunals pon chaschunar stretgas durant ils mais d'enviern tar nus, sch'i na po betg vegnir importada avunda electricitad. Ultra da quai dovra la Svizra dapli electricitad, per exempel per l'economia, dentant er per ils autos electrics e per las pumpas a chalur. Per garantir in provediment segir ha il parlament deliberà la Lescha federala davart in provediment d'electricitad segir cun energias regenerablas. Cunter questa lescha èsi vegnì fatg in referendum.
Il project stgaffescha las basas, per ch'i possia vegnir producì svelt dapli electricitad or da funtaunas d'energia regenerabla sco aua, sulegl, vent u biomassa en Svizra. Uschia duai vegnir rinforzada l'independenza da noss provediment d'electricitad. Il project cumpiglia instruments da promoziun sco er novas regulaziuns per la producziun, per il transport, sco er per l'accumulaziun e per il consum d'electricitad. La producziun d'electricitad solara duai vegnir extendida cunzunt sin edifizis. En territoris adattads resultan cundiziuns da planisaziun simplifitgadas per quels implants eroelectrics e solars ch'èn zunt impurtants per il provediment- d'electricitad durant l'enviern. Er las 16 ovras idraulicas che vegnan numnadas en la lescha, han cundiziuns da planisaziun pli simplifitgadas. Questas cundiziuns augmentan las perspectivas, ch'in project possia vegnir realisà er en cas d'eventuals recurs. Votaziuns davart novs projects d'energia restan vinavant pussaivlas.
Recumandaziun dal Cussegl federal e dal parlament: gea
Per il Cussegl federal e per il parlament è il project urgentamain necessari per pudair garantir in provediment d'electricitad segir: el è ina contribuziun impurtanta per in provediment d'electricitad fidà da noss pajais, schanegia la natira e la cuntrada ed è in pass concret per reducir l'utilisaziun da las energias fossilas.
Recumandaziun dal comité da referendum: na
Tenor il comité facilitescha la lescha la runcada da guauds e permetta la sfiguraziun da cuntradas e la destrucziun da biotops protegids. Ella restrenschia la suveranitad dal pievel, dals chantuns e schizunt da las vischnancas. I dettia dentant alternativas per garantir la segirezza dal provediment d'electricitad.
Sin admin.ch, la pagina d'internet uffiziala dal Cussegl federal, e sin l'app VoteInfo, chattais Vus infurmaziuns e links davart ils temas dals projects da votaziun.