Las autoritads svizras online

directamain tar il cuntegn

Divorzi / mort: dretg da dimora per conjugals da l’ester ed uffants

Essas Vus ina persuna estra ed avais survegnì in dretg da dimora en il rom da la reuniun da la famiglia? Conjugals divorziads resp. separads e persunas restadas enavos e lur uffants han il dretg da restar en Svizra suenter il divorzi u suenter la mort d'in genitur, sch'els adempleschan tschertas cundiziuns.

Vus avais ina permissiun da dimora (visum da la categoria B)

Per burgaisas e burgais da l’UE/AECL

Burgaisas e burgais da la UE/AECL pon dumandar ina permissiun da dimora en moda autonoma suenter la schliaziun da la lètg (divorzi, mort dal conjugal u decleranza da nunvalaivladad), premess ch'els:

  • hajan in'activitad da gudogn u
  • hajan avunda meds finanzials per pudair pajar lur custs da viver en Svizra.

Per persunas d'auters stadis

Ina permissiun da dimora existenta d'in conjugal divorzià da l'ester u dals uffants vegn prolungada, premess che:

  • la lètg haja durà maximalmain 3 onns ed ils conjugals / la famiglia hajan vivì ensemen e
  • las persunas pertutgadas sajan integradas bain en Svizra (buna reputaziun, observaziun da las valurs da la Constituziun federala, enconuschientschas a bucca da la lingua naziunala discurrida al lieu da domicil almain sin il nivel da referenza A1, voluntad da lavurar u d'absolver ina scolaziun) ubain sche
  • in'ulteriura dimora en Svizra daventa necessaria pervia da motivs persunals impurtants (p.ex. persecuziun en il stadi d'origin).

Vus avais ina permissiun da domicil (document da legitimaziun C)

Il dretg da domicil vala er suenter il divorzi u suenter la mort dal conjugal.