Las autoritads svizras online

directamain tar il cuntegn

Dretgs ed obligaziuns en cas da dischoccupaziun

Avais Vus pers Vossa lavur ed avais Vus gia annunzià quai a Vossa vischnanca da domicil u al center regiunal per intermediaziun da lavur (CIL)? Sco persuna dischoccupada avais Vus ils suandants dretgs e las suandantas obligaziuns.

Dretgs d'ina persuna dischoccupada

  • Guardai ch'il termin da desditga saja vegnì observà tenor il contract da lavur. Sch'il contract da lavur n'è betg vegnì fatg en scrit e sch'i n'exista betg in contract collectiv da lavur, sa drizza il termin da desditga tenor il Dretg d'obligaziuns. Ils termins da desditga importan:
    • 7 dis durant il temp d'emprova (per la fin dad x-in di)
    • 1 mais durant l'emprim onn da servetsch (per la fin d'in mais)
    • 2 mais dal segund fin il novavel onn da servetsch (per la fin d'in mais)
    • 3 mais a partir dal dieschavel onn da servetsch (per la fin d'in mais)
  • Ina protecziun cunter ina desditga exista durant il servetsch militar e civil, durant la protecziun civila sco er en cas da malsogna, d'accident e da gravidanza.
  • Faschai dar Voss patrun in attestat da lavur.
  • Cussegliaziun ed intermediaziun tras ils collavuraturs dal CIL
  • Indemnisaziun da dischoccupaziun: Indemnisaziun per la perdita da gudogn subida per la persuna cun in'activitad da gudogn dependenta. Quant ditg ch'insatgi survegn ina indemnisaziun dependa da sia vegliadetgna, da sia obligaziun da mantegniment e da las contribuziuns pajadas.
  • Persunas cun activitad da gudogn independenta n'èn betg assicuradas cunter dischoccupaziun.

Vus avais mo il dretg sin daners da dischoccupaziun, sche las suandantas premissas èn accumplidas (FAQ dal lieu d’entupada lavur, dumonda 2):

Obligaziuns d'ina persuna dischoccupada

  • Vus essas obligads da tschertgar ina nova plazza gia durant la perioda da desditga. Sche Vus essas emploiads parzialmain, stuais Vus cumenzar a tschertgar ina nova lavur trais mais avant che Voss contract da lavur scadia. Sche Vus na respectais betg questa obligaziun, pon vegnir scursanidas las prestaziuns.
  • Tegnai bain en salv ils documents concernent la tschertga d'ina nova plazza, sco purschidas da plazzas, brevs d'annunzia, respostas negativas. Vus stuais preschentar quests documents a Vossa cussegliadra u a Voss cussegliader da persunal dal CIL.