Las autoritads svizras online

directamain tar il cuntegn

Dimora da persunas estras senza activitad da gudogn en Svizra

Grazia a la Cunvegna davart la libra circulaziun vegnan simplifitgadas fitg ferm l'entrada en Svizra e la dimora da burgaisas e da burgais da stadis da la UE-27*/AECL**. Per persunas da stadis senza accords spezials valan percunter disposiziuns restrictivas.

Per persunas d'in pajais da la UE-27*/AECL**

Persunas senza activitad da gudogn sco per exempel persunas pensiunadas e students dastgan sa trategnair en Svizra, sch'els

  • han avunda meds finanzials per pajar lur custs da viver en Svizra, per ch'els na daventian betg dependents da l'agid social, e
  • han ina cassa da malsauns che cuvra ils custs er en cas d'accidents,
  • students ston ultra da quai preschentar lur admissiun (conferma d'immatriculaziun) ad in'universitad renconuschida.

Dimoras fin a 90 dis entaifer 6 mais na ston betg vegnir permessas. En cas da dimoras pli lungas sto la persuna s'annunziar sco persuna senza activitad da gudogn tar l'uffizi da migraziun dal chantun. La permissiun da dimora per la UE/AECL vala 5 onns (tar students vala ella per la durada da la scolaziun resp. per 1 onn, cun prolungaziun mintga onn) e vegn prolungada automaticamain, sche las premissas èn ademplidas.

Croazia

Per burgaisas e burgais croats valan disposiziuns spezialas. Quellas chattais Vus en il factsheet "Croazia".

Annunzia tar l'uffizi da migraziun cumpetent

Per persunas d'in stadi senza accords spezials

Persunas d'in pajais che na fa betg part da la UE-27*/AECL** ston

  • far ina dumonda da pudair entrar en Svizra tar la represchentanza svizra a l'exteriur,
  • avair avunda meds finanzials per pajar lur custs da viver en Svizra, per ch'ellas na daventian betg dependentas da l'agid social, ed
  • avair ina cassa da malsauns che cuvra ils custs er en cas d'accidents.

Students ston ultra da quai agiuntar a la dumonda ils suandants documents:

  • plan persunal da studi ed indicaziun da la finamira dal studi,
  • lur admissiun (conferma d'immatriculaziun) ad in'universitad renconuschida,
  • il curs da la vita persunal,
  • ina conferma ch'els bandunian puspè la Svizra suenter la finiziun da la scolaziun.

*La UE-27 consista dals suandants stadis: Austria, Belgia, Bulgaria, Cipra, Danemarc, Estonia, Finlanda, Frantscha, Germania, Grezia, Irlanda, Italia, Lettonia, Lituania, Luxemburg, Malta, Pajais Bass, Pologna, Portugal, Reginavel Unì, Rumenia, Slovachia, Slovenia, Spagna, Svezia, Tschechia, Ungaria.

**AECL: Islanda, Liechtenstein, Norvegia, Svizra