Las autoritads svizras online

directamain tar il cuntegn

Quant custa in'adopziun?

Per mintga adopziun èsi da far quint cun custs generals d'administraziun. D'agiuntar èn expensas che dependan da la cumplexitad da la situaziun, dal pajais d'origin da l'uffant e dal chantun ch'è cumpetent per la procedura.

Adopziun internaziunala

Igl è grev da numnar en cifras tut ils custs d'ina adopziun internaziunala. Quests custs pon variar da
10 000 fin 50 000 francs.

Taxas da la Confederaziun

Ils servetschs da la Confederaziun – che tanschan da la transmissiun da la dumonda d'adopziun fin a la preparaziun da l'arriv en Svizra da l'uffant – custan als geniturs adoptivs futurs 400 francs (ubain 200 francs, sch'ils documents necessaris vegnan procurads d'in post d'intermediaziun ch'è renconuschì da la Confederaziun e vegnan transmess directamain a l'autoritad d'adopziun da l'exteriur).

Sche la procedura d'adopziun dura per tscherts motivs pli ditg, pon las taxas da la Confederaziun s'augmentar sin maximalmain 1000 francs.

Ulteriuras expensas

D'agiuntar a las taxas da la Confederaziun èn (tut tenor il chantun) taxas chantunalas d'administraziun (da differenta autezza). Sche Vus As drizzais ad in post d'intermediaziun, stuais Vus er calcular ils custs per ils servetschs da quel.

Ils geniturs adoptivs futurs ston er pajar ils custs per lur viadi en il pajais d'origin da l'uffant (sgols, visums d'entrada, dimora). Tut tenor il pajais e tut tenor las relaziuns vegnis Vus As trategnair là tranter 3 e 10 emnas, avant che Vus pudais returnar cun l'uffant. Er il sgol da l'uffant en Svizra, ses visum d'entrada per la Svizra (sche l'adopziun n'è betg vegnida pronunziada a l'exteriur) e sias visitas medicinalas necessarias ston pajar ils geniturs adoptivs.

Avant che l'adopziun vegn pronunziada èsi da prevair ina perioda da 12 mais per la recepziun da l'uffant per l'adopziun. Durant quest temp viva l'uffant tar ils geniturs adoptivs futurs, medemamain a lur custs.

Adopziun naziunala

In'adopziun naziunala chaschuna cleramain damain custs. Quests custs dastgassan importar circa 2000 francs. Els cuntegnan las (differentas) taxas chantunalas, il scleriment da la qualificaziun per l'adopziun che vegn fatg da l'autoritad chantunala sco er ils custs da dretgira per la decisiun d'adopziun che vegn tratga suenter 12 mais dapi la recepziun da l'uffant per l'adopziun.

Indicaziuns davart las autoritads chantunalas cumpetentas per ils fatgs d'adopziun