Co contest jau la paternitad u ina renconuschientscha d'uffants?

Il dretg da purtar plant han:

• il bab presumà (il conjugal da la mamma da l'uffant) u ses parents, en cas ch'el è mort. Il plant sto vegnir purtà entaifer il termin dad 1 onn suenter ch'il conjugal ha intercurì la naschientscha sco er il fatg ch'el n'è betg il bab u ch'ina terza persuna pudess esser il bab. l plant sto vegnir inoltrà en mintga cas entaifer 5 onns suenter la naschientscha da l'uffant.
• L'uffant, sch'ils conjugals han liquidà la chasada cuminaivla entant ch'el era minoren. El sto purtar il plant il pli tard 1 onn suenter ch'el ha cuntanschì la maiorennitad.

Per il plant è cumpetenta la dretgira al domicil da las partidas participadas, q.v.d. da l'uffant, da la mamma u dal bab presumà (resp. da ses parents, en cas ch'el è mort).

• Sch'il renconuschider ha maridà la mamma da l'uffant, han il dretg da purtar plant la mamma, la vischnanca d'origin e da domicil dal renconuschider sco er el sez. Er l'uffant po purtar plant, sche ses geniturs han liquidà la chasada cuminaivla entant ch'el era minoren. El po er purtar plant, sch'el è vegnì renconuschì suenter ch'el ha gì cumplenì il 12avel onn da vegliadetgna.
• Sch'il renconuschider n'ha betg maridà la mamma, po la renconuschientscha vegnir contestada da quella persuna che ha in interess. Da quai fan part particularmain la mamma, l'uffant, ses descendents (en cas che l'uffant è mort) sco er la vischnanca d'origin e da domicil dal renconuschider.

Per ils dus cas che vegnan menziunads qua valan ils suandants termins per purtar plant: In plant da contestaziun sto vegnir inoltrà entaifer il termin dad 1 onn suenter che l'accusader ha intercurì la renconuschientscha sco er il fatg ch'il renconuschider n'è betg il bab u ch'ina terza persuna pudess esser il bab. Il plant sto vegnir inoltrà en mintga cas entaifer 5 onns suenter la naschientscha da l'uffant.

In uffant da sia vart po contestar la renconuschientscha fin a la scadenza dad 1 onn suenter ch'el ha cuntanschì la maiorennitad.

Cumpetenta per il plant è la dretgira al lieu da domicil d'ina da las partidas participadas.

Sche la dretgira decida a favur da l'accusader, s'extingua la relaziun da figlialanza cun tut ils effects ch'ella ha particularmain sin il num, sin il dretg da burgais e sin la tgira genituriala. La dretgira communitgescha sia decisiun a las autoritads da stadi civil per che las datas possian vegnir adattadas en il register da stadi civil.