Consequenzas giuridicas d'ina maridaglia

Ina maridaglia ha differentas consequenzas persunalas e finanzialas.

Num

Cun la nova lescha (dapi il 1 da schaner 2013) salvan ils conjugals mintgamai lur num da famiglia. Els pon dentant sa decider per in num cuminaivel.

Dretg da burgais

Ozendi n’ha la maridaglia naginas consequenzas pli per il dretg da burgais svizzer u per il dretg da burgais chantunal e communal. Ils conjugals salvan lur naziunalitad suenter la maridaglia. Ina Svizra che marida in Svizzer salvan ses dretg da burgais chantunal e communal.

Taglias cuminaivlas

Las entradas e la facultad dals conjugals vegnan adidas e ston vegnir decleradas en ina decleraziun da taglia cuminaivla. Il pèr na vegn betg suttamess cuminaivlamain a la taglia pir a partir dal mument da la maridaglia, mabain per tut l'onn fiscal.

Ierta

Sche Vus n'avais betg fatg in testament u in contract d'ierta avant Vossa mort, fixescha la lescha tgi che erta da Vus. Vossa conjugala resp. Voss conjugal ha tenor lescha adina in dretg d'ierta. Quest dretg d'ierta è per part protegì tras la part obligatorica, q.v.d. ch'il conjugal na po betg vegnir privà da quella tras testament.

Obligaziun da dar infurmaziuns

Ils conjugals ston infurmar in l’auter davart lur salari, davart lur debits e davart lur facultad.

Uffants

Cur ch’in uffant nascha, vala il conjugal da la mamma sco bab, nun ch'i vegnia cumprovà il cuntrari. Ils geniturs han er automaticamain il dretg da tgira cuminaivla per l'uffant.

Abitaziun da famiglia

Persunas maridadas pon desdir il contract da locaziun da lur abitaziun mo pli sch'ellas han il consentiment da la conjugala u dal conjugal – er sch'ellas han suttascrit sulettas il contract da locaziun. Er sch'ellas vivan en in'atgna chasa u en in'atgna abitaziun che tutga ad ina persuna suletta, na dastga la chasa u l'abitaziun betg vegnir vendida senza il consentiment da la conjugala u dal conjugal.

Curatella e sustegn

Conjugals ston assister e sustegnairin l’auter. Sche Vus essas maridada u maridà, stuais Vus sustegnair moralmain e finanzialmain Vossa dunna u Voss um, sche quai è necessari.

Divorzi

La lètg vegn schliada tras in divorzi.

Urden dals bains

Davart la partiziun da la facultad, da las entradas e dals debits pudais Vus As infurmar sin la pagina correspundenta da ch.ch.