Las autoritads svizras online

directamain tar il cuntegn

Co poss jau reglar mia ierta?

Igl è prudent da ponderar cur che Vus essas anc en vita tge che duai capitar cun Voss possess suenter Vossa mort. Tge regla la lescha e sur da tge parts da Vossa facultad pudais Vus disponer?

Tge che la lescha regla

Sche la successiun d'ierta na correspunda betg a Vossas ideas, As stattan a disposiziun las suandantas pussaivladads:

Il testament

Cun in testament pudais Vus dar a singulas persunas da Vossa facultad dapli u damain che quai ch'il dretg d'ierta prevesa. Singuls objects (collecziuns, cliniez) pudais Vus surdar sco legat a tschertas persunas. Er cundiziuns e pretensiuns pon vegnir fixadas en in testament.

Sche Vus n'avais nagins ertavels legals, pudais Vus far si Vossa entira facultad cun in testament ad ina persuna u ad ina instituziun.

Il contract d'ierta

Cun in contract d'ierta pudais Vus sco testadra u testader fixar durant la vita cunvegnas contractualas davart l'ierta cun Voss ertavels.

I dat dus differents geners da contracts d'ierta:

  • Il contract d'ierta positiv: Cun in contract d'ierta positiv As obligais Vus da relaschar Vossa ierta e/u in legat a Voss ertavels u ad ina terza persuna.
  • Il contract da renunzia a l'ierta: Vus pudais far in contract da renunzia a l'ierta u da cumpra ord l'ierta cun in ertavel.

Per far in contract d'ierta contactai in funcziunari da documentaziun sco ina notara u in notar. Per far in contract d'ierta ston tut las persunas participadas esser maiorennas. Il contract d'ierta po vegnir midà u annullà pli tard mo, sche tut las persunas participadas èn perencletgas.

Contactar ina funcziunari da documentaziun per far in contract d'ierta

La donaziun

Cun ina donaziun durant la vita pudais Vus conceder ad autras persunas ina retratga anticipada da l'ierta. Donaziuns ch'il testader ha fatg durant ils ultims 5 onns da sia vita, ston – en cas d'ina ierta – vegnir gulivadas envers ils ertavels legals. Sche las parts obligatoricas na vegnan betg resguardadas, pon ils ertavels inoltrar in plant da reducziun.

Fixai donaziuns en scrit per evitar dispitas suenter Vossa mort.