Las autoritads svizras online

directamain tar il cuntegn

Co fatsch jau in testament?

Cun in testament pudais Vus fixar tge che duai capitar cun Vossas valurs da facultad suenter Vossa mort. Plinavant As dat in testament la pussaivladad da deviar da las disposiziuns legalas.

Per pudair far in testament stuais Vus avair almain 18 onns ed esser abel da giuditgar.

I dat trais furmas dal testament:

Il testament d'agen maun

Vus scrivais in testament dal cumenzament fin a la fin a maun, al datais cun l'onn, il mais ed il di ed al suttascrivais.

Il testament pudais Vus tegnair tar Vus u al deponer – cun pajar ina taxa – tar ina persuna d'uffizi resp. tar ina notara u in notar.

N'emblidai betg da revocar tut ils testaments che Vus avais fatg pli baud. Sche Vus scrivais in supplement, sto quel esser distinguibel cleramain sco tal en il testament. Il supplement u la midada stuais Vus scriver a maun, datar e suttascriver. Sche Vus destruis Voss testament, vegn quel annullà automaticamain.

In testament d'agen maun sto cuntegnair:

  • Titel: Testament
  • Las persunalias da la testadra u dal testader sco prenum, num, data da naschientscha, lieu da burgais
  • La revocaziun da tut ils testaments da pli baud
  • Disposiziuns testamentaras: Vus pudais dar a singulas persunas dapli u damain che quai ch'il dretg d'ierta prevesa. Unicamain las parts obligatoricas (= quota minimala da l'ierta) dals ertavels legals ston vegnir resguardadas.
  • Vus pudais er surdar singuls objects (cliniez, collecziuns) u valurs da facultad (daners, immobiglia) a tscherts ertavels (legat) e formular pretensiuns u cundiziuns.  Cun Vossa facultad pudais Vus er far ina fundaziun cun in tschert intent.
  • In executur dal testament, sche Vus giavischais quai
  • Lieu e data
  • Suttascripziun

Evitai da dar en il testament ordinaziuns per la sepultura. Savens vegnan ils testaments chattads ed averts pir suenter la sepultura. Ordinaziuns davart la sepultura communitgais Vus il meglier durant la vita a Voss proxims confamigliars, a l'uffizi da sepultura u al sepultur giavischà.

Sche Vus avais dumondas u sche Vus essas malsegir As drizzai ad ina notara u ad in notar.

Model d'in testament (per plaschair scriver a maun)
Format:
PDF
Grondezza:
44 kb
Actualisà:

Il testament public

Vus communitgais Vossa voluntad ad ina persuna d'uffizi resp. ad ina notara u ad in notar ed en preschientscha da duas perditgas. La persuna d'uffizi fixescha la voluntad en in document e tegna en salv il document suttascrit. Cun lur suttascripziun cumprovan las perditgas, che Vus essas stà abel da disponer e ch'ellas enconuschan il cuntegn da la disposiziun. 

Il testament oral

Il testament oral vegn applitgà mo, sch'i n'è betg pussaivel da far in testament en in'autra furma p.ex. sch'i smanatscha in privel da mort, en cas d'eveniments da guerra e.u.v.
Vus stuais declerar Vossa voluntad davant duas perditgas. Questas perditgas ston fixar immediatamain en scrit questa voluntad cun inditgar il lieu, l'onn, il mais ed il di e cun numnar las circumstanzas spezialas, suttascriver il fixà e surdar quai a l'autoritad giudiziala.

Contestabladad da testaments

Sche testaments na resguardan betg las prescripziuns formalas u las parts obligatoricas, n'èn els betg automaticamain nunvalaivels; els ston vegnir contestads dals ertavels legals cun in plant.

Ulteriuras infurmaziuns davart il dretg d‘ierta