Las autoritads svizras online

directamain tar il cuntegn

Chattà insatge – tge stoss jau far?

Tge che Vus stuais far, sche Vus chattais in object en in spazi public, en in edifizi public u en in med da transport public.

Sche Vus chattais insatge, stuais Vus tenor lescha dar giu l'object al lieu ch'è previs per quai p.ex. tar l'uffizi d'objects chattads.

  • Sche Vus chattais insatge sin terren public (sin via), As stuais Vus drizzar a la polizia u a l'uffizi d'objects chattads da la vischnanca. Tut quai che Vus chattais en la staziun, en il tren u en in auter med da transport public stuais Vus dar giu al post cumpetent dal gestiunari.
  • Sche Vus chattais insatge en ina chasa abitada u en in edifizi public (kino, teater, sala da gimnastica, bogn e.u.v.), stuais Vus dar l'object al proprietari, al pedel u a la persuna da surveglianza.

Uffizi d'objects chattads da la vischnanca

Uffizi d'objects chattads online

L'uffizi d'objects chattads online easyfind.ch è in servetsch per tut la Svizra dal Servetsch dals objects chattads Svizra. Sche Vus chattais in object che porta in tatgader cun in code dad easyfind, pudais Vus infurmar gratuitamain il possessur sin la pagina d'internet.

Chattà in animal da chasa

Sche Vus chattais in animal, al stuais Vus annunziar tar il post chantunal d'annunzia d'animals chattads.

Dretg da survegnir ina recumpensa al chattader

Sche Vus avais chattà insatge sin terren public e sche Vus avais ademplì Vossa obligaziun sco chattader avais Vus tenor lescha il dretg da survegnir ina recumpensa al chattader "adequata"; sco valur directiva valan 10 pertschient da la valur da l'object chattà. Quai na vala dentant betg per objects engulads e per uschenumnads objects d'institut (objects chattads en edifizis u en meds da transport publics).

Tegnair l'object chattà

Sche Vus avais chattà in object, al pudais Vus tegnair suenter in termin da 5 onns – però mo, sche Vus avais ademplì las obligaziuns legalas.