Las autoritads svizras online

directamain tar il cuntegn

Cassa da malsauns per Voss poppin

Assicuranza fundamentala – il pli tard 3 mais suenter la naschientscha

Mintga poppin sto vegnir assicurà da sia represchentanta legala u da ses represchentant legal cunter malsognas a partir da sia naschientscha. Per che questa prestaziun saja garantida stuais Vus far in'assicuranza da malsauns fin il pli tard 3 mais suenter la naschientscha.

Libra tscherna da la cassa

Ils uffants ed ils geniturs na ston betg esser assicurads tar la medema cassa. Vus essas libers da tscherner la cassa da malsauns (entaifer las cassas permessas) e l'admissiun a l'assicuranza fundamentala na cuntegna naginas cundiziuns. Las cassas da malsauns na pon pia refusar a nagin l'admissiun.

Nagina annunzia u annunzia retardada

Sche Vus annunziais Voss poppin memia tard (suenter passa 3 mais), cumenza la garanzia tras l'assicuranza pir a partir da la data d'entrada, la cassa da malsauns n'indemnisescha pia betg retroactivamain Vossas expensas a partir da la naschientscha. Sch'i na vegn fatga nagina assicuranza, vegn attribuida per forza ina cassa.

Register da las assicuranzas da malsauns permessas

Assicuranzas supplementaras – sche pussaivel avant la naschientscha

Las cassas da malsauns pon refusar l'admissiun ad in'assicuranza supplementara giavischada er tar poppins, (p.ex. sch'il poppin è malsaun, cura ch'el nascha). Assicuranzas supplementaras per poppins faschais Vus perquai il meglier avant la naschientscha – sche Vossa cassa da malsauns ha ina tala purschida.