Las autoritads svizras online

directamain tar il cuntegn

Brev d'invit e decleraziun d'obligaziun

Per emetter in visum pretenda la represchentanza svizra tut tenor il pajais d'origin ina brev d'invit u ina decleraziun d'obligaziun da la persuna ch'envida.

Brev d'invit

La brev d'invit sto cumprovar che la persuna privata u la firma ch'envida il giast al spetga. Tut las indicaziuns davart la durada da la dimora, davart l'intent da la dimora e tut las entradas en Svizra ston vegnir menziunadas.

La brev sto cuntegnair las coordinatas da la persuna ch'envida (num, prenum, data da naschientscha, naziunalitad), la data e la suttascripziun da la persuna ch'envida (en cas d'ina firma da la persuna che ha il dretg da suttascriver tenor il register da commerzi). Plinavant sto la brev esser formulada en ina da las linguas naziunalas uffizialas da la Svizra.

Il petent sto cumprovar envers la represchentanza svizra (attest da salari, mussaments da banca) ch'el haja meds finanzials avunda per ses viadi. Sch'ils custs per il viadi, per l'alloschi e per l'alimentaziun vegnan surpigliads da la persuna ch'envida, sto quai er vegnir menziunà en la brev d'invit.

Decleraziun d'obligaziun

Sch'i dat dubis davart la situaziun finanziala dal petent, po la represchentanza svizra pretender ina decleraziun d'obligaziun. Quest formular uffizial vegn surdà al petent e sto vegnir suttascrit da la persuna ch'envida sco er confermà da sia vischnanca da domicil u da l'autoritad chantunala da migraziun. Cun questa decleraziun s'oblighescha la persuna ch'envida da surpigliar custs betg cuvrids fin a 30 000 francs che stattan en connex cun il viadi dal petent.

Assicuranza da malsauns da viadi

Las autoritads pretendan la cumprova d'ina assicuranza da viadi. Questa assicuranza cuvra custs en la dimensiun da 30 000 euros e cuntegna in'eventuala acziun da salvament, in repatriament per motivs medicals sco er il provediment d'urgenza en in ospital en cas d'in accident u en cas d'ina malsogna ch'è rutta ora nunspetgadamain durant la dimora. As infurmai tar Vossa societad d'assicuranza.